Lufta brenda PD, ka kaluar në plan të dytë! Gazment Bardhi, i ftuar në A2 CNN, tha se këtë çështje do e diskutojnë më vonë, por tashmë kanë një synim tjetër, që është opozita e përbashkët. Bardhi tha se Berisha është një ndër faktorët kryesor të opozitës, por nuk ndan këtë mendim për ish-aleatin e tij, Lulzim Basha.
“Berisha është ndër faktorët kryesor opozitar, është opozitar ndaj regjimit të Ramës, qëndrimi im dhe i kolegëve është që pavarësisht debateve mbi zhvillimet në PD, kemi vendosur që ta lëmë menjëherë këtë debat dhe të jemi të gjithë bashkë si opozitar. Më thoni në 2 vite, kolegu im Basha ka thënë diçka kundër Ramës, nëse e gjeni këto 2 vite, unë tërhiqem. Flet vetëm kundër opozitës, kjo nuk është strategjia e duhur e një subjekti politik që pretendon se është në opozitë”, tha Bardhi.
Pyetur nëse ndërkombëtarët sot nuk janë rreshtuar krah opozitës pikërisht për “Non Gratën” e Berishës, Bardhi ka një përgjigje.
“Nuk mund ta lidhin kurrë fatin e opozitës në vend apo qasja ndaj opozitës me qëndrimin personal ndaj një individi të caktuar, nuk bëhet fjalë për të mbështetur atë, apo ne që nuk jemi shpallur “Non Grata” dhe nuk kemi çështje me SHBA, por partnerët nuk mbështesin apo injorojnë individë, por e kanë marrëdhënien me Shqipërinë, me interesin e popullit shqiptar”, tha ai.
Në fund, sqaroi se greva e urisë është një opsion për aksionin opozitar, por ende nuk ka asnjë datë se kur ky skenar do të vihet në zbatim.
