Ministria gjermane e Financave ka ngrirë shpenzimet për zëra të shumtë të buxhetit të qeverisë pas një vendimi gjyqësor që mund të reduktojë miliarda euro shpenzime të financuara nga borxhi.
“Ngrirja e shpenzimeve goditi marrëveshjet e pagesave të avancuara për disa projekte shumëvjeçare që do të financoheshin nga fondet speciale të krijuara nga qeveria gjermane me para të huazuara”, tha sot ministria.
Vendimi vjen rreth një javë pasi Gjykata Kushtetuese Federale e Gjermanisë hodhi poshtë planin e qeverisë për të shpenzuar miliarda euro, fillimisht të destinuara për t’iu përgjigjur pandemisë së koronavirusit në projektet klimatike.
Qeveria e koalicionit gjerman tani po përpiqet të kuptojë se si të mbyllë “gropën” e buxhetit prej 60 miliardë eurosh (66 miliardë dollarë) pas vendimit.
Ministrat kishin planifikuar t’i përdornin paratë për të financuar masat për klimën, infrastrukturën dhe modernizimin ekonomik.
Zyrtarë të lartë të qeverisë kanë paralajmëruar se vendimi mund të ketë pasoja të gjera që ndikojnë edhe në fonde të tjera afatgjata, duke e komplikuar potencialisht problemin.
Qeveria gjermane mori një hua të madhe gjatë pandemisë së koronavirusit, kur u pezulluan rregullat strikte që kufizonin deficitet buxhetore dhe borxhin e ri.
