Gjykata e Posaçme la në fuqi këtë të hënë masën e sigurisë të detyrim paraqitjes dhe ndalimit të lëvizjes jashtë vendit për ish-ministrin e Shëndetësisë, Ilir Beqaj. E njëjta masë ishte kërkuar nga Prokuroria e Posaçme. Beqaj akuzohet për shpërdorim detyre në procesin penal për koncesionin e sterilizimit të pajisjeve kirurgjikale.
Në seancën e sotme, prokuroria kishte kërkuar më herët edhe marrjen në pyetje të ish-ministrit. Por, në një njoftim zyrtar, GJKKO bëri me dije se personi nën hetim Ilir Beqaj “përfitoi nga e drejta për të mos dhënë deklarime në seancën e marrjes në pyetje sipas nenit 248 pika 2 të K.Pr.Penale”.
Në një prononcim për gazetarët pas seancës, Beqaj i mëshoi pretendimit se është i pafajshëm dhe mbrojti koncesionin.
“Vazhdoj të besoj se çfarë kemi bërë ka qenë thelbësor. Në janar bëhet 8 vite që po hetohet, ndërkohë që në këto 8 vite operohet në kushte sterile”, tha.
Hetimet e SPAK-ut treguan se zyrtarët e Ministrisë së Shëndetësisë fryn në mënyrë fiktive me 56 përqind koston e koncesionit të Sterilizimit. Kostoja totale koncesionare Sterilizimit llogaritet në mbi 100 milionë euro, ndërsa pikëpyetja më e madhe është-ku shkoi ajo shtesa fiktive prej 56 përqind, ose e thënë në shifra më konkrete-rreth 60 milionë euro. Ndërkohë, struktura e Posaçme Anti-Korrupsion, edhe pas tre vitesh hetime, nuk është në gjendje ta thotë se ku përfunduan paratë.
Një përgjigje për këtë e ka opozita, që akuzon se ato u vodhën nga dyshja Rama-Beqaj. Për këtë të fundit, opozita shrpehet se u amnistua nga SPAK, duke mos e arrestuar dhe zbutuar sipas saj, akuzën në ngarkim të ish-ministrit të Shëndetësisë.
“Aktakuza e diktuar nga Edi Rama e SKAPI-t të partisë për Beqën, për shpërdorim detyre se nuk parandaloi konfliktin e interesit mes biznesmenit dhe vartësit, dmth mes Rrapajt dhe Rrjepajt, se nuk ka konstatuar kostot e fryra, është një tallje e ulët cinike për shqiptarët, është dëshmi totale e keqpërdorimit të SKAP si një organizatë kriminale në funksion të pushtetit të Edi Ramës, është amnistia e dytë në katër muaj e Beqës nga Edi Rama dhe SKAP i tij”, deklaroi kryedmokrati Berisha këtë të hënë në një deklaratë nga selia blu.
“Me akuzën e dytë për shpërdorim detyre, de facto amnistinë e dytë të Ilir Beqës brenda 4 muajsh, Edi Rama provoi dje në mënyrë përfundimtare se ai është pronari kryesor, është aksionari i parë me distancë i aferës së vjedhjes së dytë të shekullit, apo siç e quajnë tani rendom qytetarët, inceneratorëve të shëndetësisë. Kurse Beqaj është thjesht hajduti i tij i dobishëm. Rrjepaj dhe stër-Rrepaj janë vetëm pronarët në letër, apo Zotot dhe Mërtirët e kësaj afere”, shtoi ai.
Lexo edhe:
Dështim spektakolar i SPAK me Ilir Beqjan. A është kapur politikisht drejtësia e re?
