Lidhur me hetimet për koncesionin e sterilizimit, SPAK thotë se zyrtarët e Ministrisë së Shëndetësisë fryn në mënyrë fiktive me 56 përqind koston e koncesionit të Sterilizimit. Kostoja totale koncesionare e sterilizimit llogaritet në mbi 100 milionë euro, ndërsa pikëpyetja më e madhe është-ku shkoi ajo shtesa fiktive prej 56 përqind, ose e thënë në shifra më konkrete-rreth 60 milionë euro. Ndërkohë, struktura e Posaçme Anti-Korrupsion, edhe pas tre vitesh hetime, nuk është në gjendje ta thotë se ku përfunduan paratë.
Një përgjigje për këtë e ka opozita, që akuzon se ato u vodhën nga dyshja Rama-Beqaj. Për ish-ministrin e Shëndetësisë, opozita shprehet se u amnistua nga SPAK.
Në një deklaratë për mediat nga selia blu, kreu i PD-së Sali Berisha tha se aktakuza për Ilir Beqajn, “e shkruar në zyrat e Edi Ramës, është një tallje e ulët, cinike, me shqiptarët, është dëshmi tjetër flagrante e shndërrimit të SKAP-it në një organizatë të rrezikshme kriminale për shoqërinë shqiptare”.
“Ajo është de jure dhe de facto, amnistia e dytë brenda 4 muajsh nga SKAP-i i partisë, për hajdutin Ilir Beqaj dhe mbrapa tij, Edi Rama”, theksoi ai.
“Aktakuza e diktuar nga Edi Rama e SKAPI-t të partisë për Beqën, për shpërdorim detyre se nuk parandaloi konfliktin e interesit mes biznesmenit dhe vartësit, dmth mes Rrapajt dhe Rrjepajt, se nuk ka konstatuar kostot e fryra, është një tallje e ulët cinike për shqiptarët, është dëshmi totale e keqpërdorimit të SKAP si një organizatë kriminale në funksion të pushtetit të Edi Ramës, është amnistia e dytë në katër muaj e Beqës nga Edi Rama dhe SKAP i tij.
Me akuzën e dytë për shpërdorim detyre, de facto amnistinë e dytë të Ilir Beqës brenda 4 muajsh, Edi Rama provoi dje në mënyrë përfundimtare se ai është pronari kryesor, është aksionari i parë me distancë i aferës së vjedhjes së dytë të shekullit, apo siç e quajnë tani rëndom qytetarët, inceneratorëve të shëndetësisë. Kurse Beqaj është thjesht hajduti i tij i dobishëm. Rrjepaj dhe stër-Rrepaj janë vetëm pronarët në letër, apo Zotot dhe Mërtirët e kësaj afere”, tha kreu i PD-së.
