Presidenti turk, Recep Tayyip Erdogan ka thënë se Turqia do të bëjë përpjekje për të rindërtuar infrastrukturën e shkatërruar, spitalet dhe shkollat në Rripin e Gazës nëse arrihet armëpushim.
“Nëse arrihet armëpushim, ne do të bëjmë gjithçka që është e nevojshme për të kompensuar shkatërrimin e shkaktuar nga Izraeli”, u tha Erdogan gazetarëve që gjendeshin në avionin me të cilin lideri turk po kthehej nga Gjermania.
Ndërkohë qeveria e Hamasit ka njoftuar se 12,300 palestinezë janë vrarë në bombardimet izraelite në Rripin e Gazës që nga fillimi i luftës më 7 tetor.
Ndër të vdekurit janë 5000 fëmijë dhe 3300 gra, sipas qeverisë së organizatës që drejton enklavën palestineze, ndërsa 30000 janë plagosur.
Ministria e Shëndetësisë e Hamasit siguron nga ana e saj se dhjetëra trupa janë të shtrirë në rrugët e sektorit verior të Rripit të Gazës dhe se është e pamundur të regjistrohen sepse ushtria izraelite po qëllon mbi ambulancat dhe personelin mjekësor që përpiqen të afrohen.
