Në emisionin “Opinion” ka qenë e ftuar Amal Naim, e cila është riatdhesuar nga shteti shqiptar, pasi iku nga Gaza. Ajo u kthye në Shqipëri me fëmijët e saj, por pas ka lënë bashkëshortin dhe vëllain.
Amal Naim rrëfen se bashkëshorti i saj nuk e kaloi dot kufirin e Gazës, pasi nuk kishte pasaportë shqiptare. Ajo u shpreh se fëmijët po presin të atin, qajnë dhe thonë që më mirë të mos kishin dalë dhe të kishin vdekur në Gaza me babain.
Histori e trishtë edhe për vëllain e Amal. Ai gjithashtu kishte mundësinë të kthehej në Shqipëri, por zgjodhi të qëndronte në Gaza ku ka edhe gruan bashkë me 4 fëmijët. Shkak është bërë fakti që nuk lejohej të kthehej e shoqja e tij, palestineze.
Amal Naim: Ato më bënë vetëm një leje kalimi.
Blendi Fevziu: Autoritetet shqiptare?
Amal Naim: Autoritete shqiptare, për të dalë nga Gaza. Edhe më morën, më thanë që për burrin nuk mund të bëjmë dot gjë sepse ai nuk…
Blendi Fevziu: Nuk është shtetas shqiptar.
Amal Naim: Nuk bënte as për gruan e vëllait tim.
Blendi Fevziu: Po vëllai pse qëndroi në Gaza?
Amal Naim: Për gruan e vetë.
Blendi Fevziu: Për gruan? Sepse bashkëshorten, nuk e ekstradonin dot?
Amal Naim: Jo, nuk e nxirrnin dot si burri im. Ajo nuk ka domethënë pasaportë palestineze.
Blendi Fevziu: Pasaportë shqiptare?
Amal Naim: As palestineze, as shqiptare domethënë letërnjoftimi…
Blendi Fevziu: Po letërnjoftimi. Domethënë s’ka pasaportë fare?
Amal Naim: Po.
Blendi Fevziu: Kështu që ishte e pamundur të dilte nga territori i Gazës?
Amal Naim: Po e pamundur të dilte nga aty.
“Fëmijët e mi po presin babain e tyre me padurim dhe qajnë më thonë mami mos kishim dalë, kishim vdekur me babin. Babai i tyre na la ne të iknim. Edhe vëllai im ndenji atje tha do vdes me gruan nuk mund të dal pasi edhe fëmijët nuk mund të dalin pa nënën e tyre. Edhe unë kur më doli mundësia për të dalë, doli me emra, doli emri i fëmijëve dhe mua jo. Po si ka mundësi sepse duhet të dal unë para fëmijëve. Pastaj nuk deshën fëmijët të dilnin pa mua dhe me vëllain tim. Si të dilte? Të merrte fëmijët e motrës dhe fëmijët e vet dhe dil, dhe ne gratë të rrinim në luftë. Është e palogjikshme”, tha Amal
