Ish-prokurori dhe eksperti i sigurisë, Eugent Beçi bëri deklaratën e fortë në emisionin “Open” në News24, ku tregoi se si është vënë në shënjestër nga Dritan Rexhepi, i cili u arrestuar ditë më parë në Stamboll, Turqi.
Beçi tha se është kërcënuar me jetë nga Rexhepi, pasi ishte duke hetuar dosjen e tij. Ai u shpreh se personazhe të tilla kur nuk arrijnë të blejnë dot drejtësisë, kërkojnë që ta blejnë atë, ndërsa shtoi se ngjarja është mbajtur e fshehtë për të mos pasur probleme te familjarët.
“Kam qenë në shënjestër të Dritan Rexhepit. Jam kërcënuar me jetë. Është kryer hetim dhe është ndalur dy herë tentativa ndaj meje. Tentativa për asgjësim për dosjet që kisha nën hetim. Ai ka pasur disa tentativa vrasjeje, që i kemi gjykuar dhe dënuar. Kishte arritur të dalë. Pati një tentativë që u ndalua në kohë nga Policia në Vlorë dhe në Tiranë. Personazhe të tilla kur nuk blejnë dot drejtësinë e sulmojnë në mënyrat më të ndryshime. Kemi të bëjë me një personazh të arratisur nga burgjet e tre shteteve. Këto ngjarje mbahen të fshehura për të mos pasur probleme te familjarët dhe kolegët.” u shpreh Beçi.
