Janë caktuar masat e sigurisë për tetë personat e arrestuar më 8 nëntor të këtij viti në Gjirokastër, pasi akuzohen se mashtronin të huajt përmes bursave fiktive, duke përvetësuar shuma të mëdha parash.
Mësohet se Gjykata e Gjirokastrës ka lënë në burg 2 prej 8 të arrestuarve. Më konkretisht, Emiljano Paja dhe Alma Haruni. Ndërkohë për 6 shtetasit e tjerë, Eni Sula, Mario Sota., Erion Hoxha, Saimir Brakaj, Fjoralba Hoxha, dhe Erjona Murrizi, është caktuar masa “arrest shtëpie”.
“U arrestuan në flagrancë 8 shtetas, të cilët rezultuan se ishin bashkëpronarë dhe punonjës në dy subjektet “Call Center”, konkretisht shtetasit E.S. 32 vjeç, banues në Tiranë, E.P. 28 vjeç, banues në Tiranë, M.S., 29 vjeç, banues në Tiranë, E.H. 23 vjeç, banues në Fushë Krujë, A.H. 32 vjeç, banuese në Tiranë, S.B. 35 vjeç, banues në Vlorë, F.H. 27 vjeç, banuese në Tiranë dhe E.M. 26 vjeç, banuese në Tiranë.
Gjykata e Shkallës së Parë të Juridiksionit të Përgjithshëm Gjirokastër, më datën 11.11.2023, ka vendosur vleftësimin si të ligjshëm të arresteve në flagrancë dhe ka caktuar masat e sigurisë “Arrest në burg”, për shtetasit E.P. dhe A.H. dhe masat e sigurisë “Arrest në shtëpi”, për shtetasit E.S, M.S., E.H, S.B, F.H. dhe E.M”,- thuhet në njoftimin e policisë.
Ndërkohë janë sekuestruar në cilësinë e provës materiale 2 servera me të dhëna, 2 pajisje “DVR”, 75 pajisje komjuterike të llojit laptop, 25 pajisje komjuterike të llojit PC, 35 aparate celulare, disa blloqe shënimesh me emrat e personave të mashtruar dhe shumave të përvetësuara, një shumë parash prej 13 500 eurosh dhe një makinë luksoze e viteve të fundit, e cila dyshohet se është produkt i pastrimit të parave nga aktiviteti i mashtrimit.
