Është zbardhur dokumenti i ekspertrizës mjeko-ligjore për vdekjen e 3-vjeçarit Brian Spahiu, i cili humbi jetën pas një ndërhyrje kirurgjikale në kliniken dentare “Splendent” të mjekut Roland Xhaxho dhe vajzës së tij, Ina Xhaxho.
Ekspertët e Institutit të Mjekësisë Ligjore kanë dalë në përfundimin se shkaku i vdekjes ka qenë dhënia e lëndës anestetike.
“Shkaku i vdekjes ka qenë dhënia e lëndës anestetike që ka sjellë vuajtjen qelizore të thellë me mekanizmin e insuficiencës multiorganore të parikthyeshme”, thuhet në akt-ekspertizë
Ndërkohë, Prokuroria e Tiranës ka kërkuar ekspertim të dytë të rezultateve të autopsisë për shkaqet e vdekjes së 3-vjeçarit, arsyet të cilat ende nuk dihen pse është bërë kjo kërkesë. Burimet thonë se rezultatet e reja pritet të dalin në fillim të javës së ardhshme.
3-vjeçari humbi jetën në reanimacionin e pediatrisë më 1 tetor, 3 ditë pasi kreu ndërhyrjen kirurgjikale te dentistja Ina Xhaxho për mbushjen e 14 dhëmbëve. Ka qenë babai i saj, Roland Xhaxho që ka kryer anestezinë dhe të dy janë nën hetim për veprën penale “Neglizhenca në trajtimin mjekësor”, ndërsa Prokuroria e Tiranës po vijon hetimet.
Mjeku Xhaxho ka mohuar faktin se shkak i kësaj gjendje ka qenë mbidoza nga narkoza. Ai ka deklaruar se djali doli zgjuar nga klinika, ndërsa ka hedhur poshtë pretendimet e familjarëve të viktimës. Sipas familjarëve, i mituri është ndjerë keq pasi ka dalë nga klinika dhe ka ndërruar jetë i shtruar në spital. Ata kanë akuzuar mjekun se i ka dhënë mbidozë narkoze djalit, duke i shkaktuar atij dhe vdekjen.
Dokumenti: