Ish-presidenti dhe kreu i Partisë së Lirisë, Ilir Meta ka folur për mediat pasi u mor në pyetje nga SPAK.
Meta u fut në ambientet e SPAK mengjesin e sotëm.
Në një prononcim për mediat, pak para se të hynte në ambientet e prokurorisë, Meta tha se është thirrur për çështjen ÇEZ-DIA. “Është një telenovelë, që është e gjykuar nja dy herë, dhe është rihapur për rastin konkret në dhjetor të 2029 nga një kallëzues i rremë që është dënuar dy herë nga gjykata për shpifje dhe për dhunë në familje”, tha Meta.
Një qëndrim të ngjashëm mbajti dhe pas daljes nga SPAK, ku qëndroi për rreth 2 orë. Meta është shprehur se kjo është një çështje e cila është gjykuar 2 herë dhe tashmë është rihapur për të tërhequr vëmendjen nga skandalet e qeverisë.
“Kjo ëshë një çështje që ndikohet politikisht nga Edi Rama për të zhvendosur vëmendjen nga të tjera gjëra. Nuk kam asnjë interes për dëshmitë që ka SPAK, është detyra e tij të hetoj. Jetojmë në kohën kur dëshmitë e rreme dhe kallzuesit e rremë janë bërë të modës sepse kemi një qeveri që kërkon të shmangë vëmendjen nga skandalet e mëdha. Unë jam këtu dhe do të jem gjithmonë transparent për çdo akt vendimmarje që kam marrë në të kaluar”, tha kreu i PL.
Ai theksoi se “nuk ekziston asnjë akt, asnjë shkresë, asnjë dokument, asnjë urdhër, asnjë iniciativë për ligje, akte nën ligjore nga Ilir Meta si zv.kryeministër apo si ministër i Ekonomisë në interes të askujt”.
“Përgjigja ime është përsëri ajo që kam thënë më parë, ajo që po them përsëri dhe që do ta theksoj në çdo rast tjetër. Nuk ekziston asnjë akt, asnjë shkresë, asnjë dokument, asnjë urdhër, asnjë iniciativë, për ligje, për akte nënligjore dhe gjithçka tjetër, nga Ilir Meta në detyrat e tij si zv. kryeministër apo ministër i Ekonomisë në interes të askujt, përfshirë këtu edhe DIA-n, edhe CEZ-in dhe madje ministria e Ekonomisë si pronare 100% e aksioneve të KESH-it e ka denoncuar vendimin e ERE-s që favorizonte CEZ-in në dhjetor të vitit të 12-të për blerjen e çmimit të energjisë në dëm të KESH-it dhe në dëm të konsumatorëve shqiptarë,” – u shpreh Meta.
Kreu i PL-së sqaroi se është pyetur në cilësinë e personit që ka dijeni për rrethana të caktuara.
