Dhjetëra prindër së bashku me fëmijët e tyre kanë dalë në protestë përpara kopshtit privat “Stinët” ku edukatorja dhunoi një vogëlushe deri në pikën ku i ka thyer asaj këmbën.
Përpara kopshtit janë mbledhur disa prindër, nëna me fëmijët e tyre. Ata shprehen se çdo formë e dhunës është e papranueshme ndaj një fëmije.
Gjithashtu rrëfejnë se këto raste janë mjaft të përsëritura në kopshtet e vendit. Më së shumti ata thonë se incidente të tilla ndodhin në kopshte private.
“Vij të mësoj dhe argëtohem, jo të dhunohem!”, “Mos më dhuno, unë jam i vogël”, “Dhuna nuk ka justifikimi”, kanë qenë këto disa nga thirrjet e bëra nga fëmijët dhe qytetarët me pankarta në duar.
Mamaja e fëmijës pretendon se e bija 3-vjeçe është dhunuar brenda kopshtit privat “Stinët” në rrugën “Kushtrimi i lirisë” në kryeqytet. Ngjarja sipas saj ka ndodhur në datën 1 Nëntor 2023, ku vajzës i është thyer këmba nga dhuna. Sipas prindërve kjo nuk është hera e parë që në këtë institucion privat të kujdesit ndaj fëmijëve ushtrohet dhunë ndaj tyre.
