Deputeti i Partisë Demokratike, Bledion Nallbati dha një prononcim për gazetarët pas daljes nga SPAK.
Ai deklaroi se debati me kolegun socialist, Vullnet Sinaj nuk e nderon, por as nuk është gjëja më e turpshme që ka ndodhur në parlamemt.
Nallbati theksoi se nuk e ka goditur kolegun, ndërsa shtoi se SPAK-ut i takon të bëjë punën e vet.
“As më goditi dhe as e godita. Unë shkova të marr kartën, ai reagoi në atë mënyrë, patëm një konfrontim fizik dhe kaq. SPAK-u do bëjë punën e vet, në do bëjmë punën tonë. Unë nuk ndërhyj në punën e SPAK-ut. Pa diskutim që ka një vendim që e ka përcaktuar këtë punë, megjithëse ajo që ka ndodhur në rastin e Strazimirit, me atë që ka ndodhur në rastin tonë nuk kanë asnjë ngjashmëri me njëra-tjetrën. S’kam qëlluar njeri, më ka tërhequr, më ka shtyrë dhe e kam shtyrë. Sigurisht, e kam deklaruar edhe njëherë tjetër që të tilla veprime nuk nderojnë askënd, por po ju bëj të qartë një gjë, që në atë parlament ndodhin gjëra shumë më të turpshme se aq të cilat janë vjedhja masive që po ju ndodh qytetarëve çdo ditë,” – u shpreh deputeti.
