Autoritetet gjermane kanë arrestuar një 35-vjeçar, pasi kishte marrë peng vajzën e tij 4 vjeç, dhe e mbante në ambjentet e aeroportit të Hamburgut.
Rrëmbimi i vajzës shkaktoi ndërprerjen e disa fluturimeve brenda dhe jashtë aeroportit për 18 orë rresht, duke shkaktuar kështu panik edhe tek pasagjerët.
Mediat e huaja bëjnë me dije se burri është arrestuar nga policia dhe vajza ishte në gjendje të mirë shëndetësore.
Si ndodhi ngjarja ?
Të shtunën rreth orës 20.00, i armatosuri ka thyer hekurin e portës me makinën e tij dhe është futur në pistën e aeroportit, duke qëlluar dy herë në ajër dhe duke hedhur dy shishe flakë, të cilat dukeshin si Kokteje molotov, sipas një zëdhënësi të policisë. Policia tha se beson se incidenti lidhet me një mosmarrëveshje për kujdestarinë e fëmijëve.
Sipas autoriteteve policore, në makinë ndodheshin një baba dhe fëmija i tij. Gazeta Bild raportoi se burri është 35 vjeç dhe me kombësi turke, ndërsa fëmija është një vajzë 4-vjeçare. Policia tha se negociatat po zhvillohen në gjuhën turke.
Më herët, gruaja e drejtuesit të makinës kishte njoftuar policinë për rrëmbimin e fëmijës, tha një zëdhënës i policisë. Mbrëmë, 17 fluturime të planifikuara për t’u ulur në Hamburg, me 3200 persona në bord, u devijuan drejt aeroporteve të tjera. Për sot janë planifikuar 286 fluturime me 34500 pasagjerë.
Burimi: BBC
