Gjykata e Shkallës së Parë në Fier ka lënë në fuqi masën e sigurisë “arrest me burg” për Elmir Tufën, i akuzuar si një prej autorëve të vrasjes së Shkëlzen Kastratit, ngjarje kjo e ndodhur në 1 shkurt të vitit 2021.
Gjatë seancës së sotme, Elmir Tufa dhe avokati i tij pretenduan se ditën e ngjarjes kanë qënë në gjykatën e Krujës në një gjykim zëvendësim mase sigurimi të një kushëriri të tij dhe pretendonin se kishin pamje filmike për këtë fakt, duke përsëritur edhe një herë mos përfshirjen në vrasjen e biznesmenit 42- vjecar.
Mbi 31-vjeçarin rëndojnë akuzat veprat penale “Vrasje me paramendim” e kryer në bashkëpunim, “Mbajtja pa leje dhe prodhimi i armëve shpërthyese dhe i municionit”.
Ndërkohë, i arrestuar për vrasjen e Shkëlzen Kastratit është dhe Albert Zaja, i cili u kap në prill të vitit 2021 teksa përpiqej të arratisej nga forcat RENEA në FushëKrujë. Ndërkohë, në kërkim për ngjarjen janë Elson Xheçuka e Roland Cara, të cilët dyshohen se janë pjesë e një grupi vrasësish me pagesë.
Si ndodhi atentati?
Paraditen e 1 shkurtit 2021 biznesmeni Shkëlzen Kastrati po lëvizte me mjetin e tij tip Benz në fshatin Sheq të Fierit, – ku kishte dhe lokalin e tij – kur u qëllua me breshëri kallashnikovi nga brenda një fuoristrade Range Rover. Kastrati ka ecur edhe disa metra me makinë duke u përplasur me një makinë tjetër që po kalonte aty.
Dy plumbat, një në krah dhe një në kokë i morën jetën biznesmenit Kastrati. Hetimet u përqendruan tek hakmarrja, pasi 5 vite më parë është tentuar të vritet në atentat, vëllai i tij, Klemend Kastrati. Nga ajo ngjarje humbi jetën Denis Kasaj nga Vlora, kurse Klemendi u plagos. Tentativa e eliminimit të tij u konsiderua për hakmarrje pasi nga hetimet e kryera në atë kohë ka rezultuar se Klemend Kastrati ishte i implikuar në një plagosje të vitit 2008, për shkak të një konflikti për makina, por ai u dyshua dhe për një vrasje të ndodhur në vitin 2012.
I arrestuari i parë për këtë atentat është Albert Zaja, i cili u prangos nga RENEA më 21 mars 2021 në fshatin Larushk të Fushë-Krujës. Në listën e policisë si autor i ngjarjes përveç Albert Zajës që mohoi akuzën, ishte edhe Elmir Tufa, i cili u kap në Fushë-Krujë tre ditë më parë, më 2 nëntor. Dy të dyshuarit si bashkëpunëtorë në krim, Elson Xhecuka 29 vjeç dhe Silvio alias Roland Cara 41 vjeç, janë ende në arrati. Ata dyshohen se janë pjesë e një grupi vrasësish me pagesë.
