Skuadra e Kukësit nuk po gjen qetësi sa u përket dëmtimeve, teksa i fundit që e ka pësuar në stërvitje është mbrojtësi titullar, Franci Lala.
24-vjeçari, sipas të gjitha gjasave do të mungojë ndaj Dinamos në sfidën që do të zhvillohet ditën e nesërme.
Verlindorët vuajnë edhe dëmtimet e mesfushorëve, Daniel Momoh dhe Abdou Mbarak, që gjithashtu nuk janë të gatshëm për këtë ndeshje.
E njëjta gjë mund të thuhet edhe për fantazistin Françesko Hasaj, i cili doli i dëmtuar në ndeshjen e dy javëve më parë ndaj Laçit.
Një situatë jo e mirë, por gjithsesi trajneri Stavri Nica do të mundohet të sajohet me lojtarët që ka në dispozicion.
Alternativat nuk mungojnë, ndërsa një rikthim i rëndësishëm për të dielën është ai i mbrojtësit Endri Reçi.
