Dy shtetas janë arrestuar dhe dy të tjerë janë shpallur në kërkim këtë të mërkurë në Vlorë, pasi akuzohen për kontrabandë mallrash.
Blutë bëjnë me dije se në pranga kanë rënë shtetasit O. Gj., 35 vjeç, dhe R. S., 47 vjeç, pasi janë kapur duke transportuar me kamion mallra të ndryshme, të papajisura me faturat tatimore, me vlerë 30 000 euro.
Ndërkohë janë shpallur në kërkim I. H., 40 vjeç dhe A. S., 38 vjeç, të dy me detyrë doganier në PKK Kakavijë, pasi akuzohen për shpërdorim detyre
“U vunë në pranga shtetasit O. Gj., 35 vjeç, dhe R. S., 47 vjeç, banues në Vlorë.
Këta dy shtetas u kapën në flagrancë, në vendin e quajtur “Rrethrrotullimi i Nartës”, teksa transportonin me kamion, me qëllim shitjen, mallra të ndryshme, të papajisura me faturat tatimore apo me deklaratat e origjinave, me vlerë 30 000 euro. Mallrat dyshohet se janë kontrabanduar nga Greqia në vendin tonë, duke kaluar nga pika doganore e PKK Kakavijë, pa kryer procedurat e zhdoganimit.
Mallrat u sekuestruan me cilësinë e provës materiale, së bashku me kamionin.
Në vijim të veprimeve procedurale u bë shpallja në kërkim për veprat penale “Shpërdorimi i detyrës” dhe “Kondrabanda nga punonjës që lidhen me veprimtarinë doganore”, e shtetasve I. H., 40 vjeç dhe A. S., 38 vjeç, të dy me detyrë doganier në PKK Kakavijë”,- njofton Policia.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Vlorë, për veprime të mëtejshme.
