Deputetët e Partisë Demokratike kanë bllokuar zhvillimin e punimeve edhe në mbledhjen e Komisionit të Ekonomisë, si zhvillim i aksionit opozitar.
Demokratët janë futur të parët në sallë duke mos lejuar vijimin e mbledhjes normalisht. Socialistët janë larguar nga godina, dalja e së cilës tanimë është shumë pranë selisë së re të PD-së drejtuar nga Lulzim Basha.
Deputeti Flamur Noka ka përfituar duke ironizuar kështu largimin e tyre, se mund të shkojnë pranë selisë së Bashës.
“Ka byrek atje, ka dhe byrek Luli, ju jep dhe byrek shkoni atje!”, dëgjohet të thotë Noka, duke iu referuar një video të dy ditëve më parë kur kreu i PD-së, Lulzim Basha u shfaq duke ngrënë byrek.
Më herët, demokratët tentuan të bllokonin dhe punimet në Konferencën e Kryetarëve, por u zhvilluan pas disa orësh me ndihmën e gardistëve, të cilët nuk lejuan deputetët opozitar të futen brenda.
Kujtojmë se opozita ka paralajmëruar bllokim të çdo aktiviteti parlamentar deri në plotësimin e kërkesave të tyre. Kjo sjellje e tyre vjen pas bllokimit që maxhoranca iu ka bërë komisioneve hetimore parlamentare të kërkuara nga opozita si dhe ndryshimeve që ata kanë kërkuar në përbërjen e Komisionit të Reformës zgjedhore.
