Vajza e kreut të PD Sali Berisha dhe bashkëshortja e Jamarbër Malltezit, Argita Malltezi i quajti “rrëshqitje jashtëzakonisht e rëndë e shtetit të së drejtës” akuzat e ngritur në procedimin penal për privatizimin e ish-kompleksit “Partizani”.
“Është rrëshqitje e rëndë e shtetit të së drejtës, për të gjithë sistemin që mban në këmbë shtetin shqiptar”, theksoi pedagogia e Fakultetit të Drejtësisë në emisionin “Top Story”, mbrëmjen e kësaj të hëne.
Arrestimin e bashkëshortit të saj në Rinas nga policia e konsideroi një lëvizje të kalkuluar. Ndërsa institucionin e policisë e quajti “të diktuar nga mllefet politike të Edi Ramës”.
“Kronometrimi i momentit ishte i mirëmenduar, sapo fola më tha po të pres dhe më pas të tha që ishte arrestuar. Arrta të flas pas dy ditësh, moralisht ishte shumë mirë që natën e parë kur u takua me avokatët”, tha ajo.
Lidhur me vendimin e GJKKO të kërkuar nga SPAK për vendosjen e sekuestrove ndaj disa pasurive të Jamarbër Malltezit, ajo tha se janë vendosur nën sekuestro prona të blera në vite të ndryshme që s’kanë asnjë lidhje me privatizimin e ish-kompleksit sportiv.
Argita Malltezi e cilësoi të habitshme dhe jo ligjore faktin që gjatë tre viteve hetimesh për çështjen, nuk janë pyetur Sali Berisha dhe Jamarbër Malltezi.
“Si mund të shkojë dosja në gjykatë?! Pse? Sepse kur të dilte dosja, të mos dilte se çfarë thoshin këta dy persona. S’kanë dashur që kjo të dalë në media. Sepse ky është një sulm politik i orkestruar nga Rama. SPAK dhe GJKKO kanë vepruar si kamxhik në duart e Ramës”, u shpreh.
Po ashtu, vendosjen e një mase sigurie nga GJKKO ndaj Berishës duke anashkaluar Kuvendin, e quajti praktikë jo ligjore.
Argita Malltezi tha se prona e familjes Bega – trashëgimtari i së cilës është bashkëshorti i saj – ka dashur 15 vite që të kthehet dhe nuk ka pasur asnjë ndikim nga Sali Berisha. Po ashtu, përmendi se Agjencia e Trajtimit të Pronave të kohës – institucion i hallkës në privatizimin e “Partizanit” – ishte me përbërje në shumicë prej të zgjedhurve nga Partia Socialiste.
Deklaratat e Taulant Ballës se prona në fjalë është shpronësuar nga italianët në vitin 1940 e quajti të gënjeshtërt dhe shtoi se “SPAK u bë altoparlant i sulmeve të Edi Ramës”, me mosverifikimin e këtij informacioni. “A kishte mudësi SPAK ta verifikonte këtë? Absolutisht!E nisën në bazë të kësaj, SPAK nuk është drejtësi, por sulm kamxhik politik”, tha.
Në vitin 2006, Kryetari i Këshillit të Rregullimit të Territorit, Bashkia Tiranë të kohës – Edi Rama – vendosi që të ndryshojë destinacionin e pronës, duke e kthyer në zonë banimi”, territorin që i përkiste klubit sportiv “Partizani”. E pyetur në studio se pse Këshilli Kombëtar i Rregullimit të Territorit – i drejtuar nga Berisha – nuk refuzoi vendimin e KRRT-së së Bashkisë së Tiranës, Malltezi shpjegoi se nëse do të vepronte në këtë mënyrë, Berisha do të shkeljet Kushtetutën.
Argita Malltezi solli edhe në kujtesë se procesi i privatizimit nuk nisi nga Fatmir Mediu, ish-minitri i Mbrojtjes në qeverinë Berisha, por nga qeveria paraardhëse socialiste e drejtuar nga Fatos Nano dhe tha se kjo provohet në korrespodencën mes ministrave të kohës, Pandeli Majko, Anastas Angjeli dhe Blendi Klosi.
E pyetur se pse Jamarbër Malltezi mori prokurë për të përfaqësuar familjet e shpronësuara, ajo saktësoi se ai ka pasur prokurë vetëm për të përfaqësuar disa prej familjarët e tij. Ajo tha kjo ndodhi pas vitit 2004, kohë kur siç shpjegoi, prokurën deri në këtë periudhë e kishte gjyshja e motrës së Jamarbër Malltezit. Pas vdekjes së saj, tha Argita Malltezi, bashkëshorti Jamarbër mori prokurë përfaqësimi vetëm nga disa prej familjarëve të vet dhe këtë e cilësoi një veprim tejet normal.
Akuzat e SPAK se Sali Berisha mori vendime qeverie për të favorizuar Jamarbër Malltezin, ajo i cilësoi “abuzimi më skandaloz” i akuzës. Argita Malltezi tha se ndryshimet ligjore të qeverisë Berisha prekën një numër të konsiderueshëm qytetarësh, ndaj edhe argumenti i SPAK se u bënë për të favorizuar bashkëshortin e saj nuk qëndrojnë.
Aksionet në kompani
Lidhur me kuotat në kompaninë “Homeplan”, për të cilat SPAK thotë se Jamarbër Malltezi nuk i ka deklaruar, ajo tha se nuk deklarojnë personat e lidhur me personin e lidhur me zyrtarë. Dhe këtë, shpjegoi se e ka marrë si përgjigje nga ILDPKI në një kërkesë që ka bërë më herë ndaj institucionit për një rast tjetër.
“Thelbi është i mashtrimit është se (Jamarbër Malltezi) kishte 113 metra katrorë (tokë) dhe fitoi 5 mln euro”, theksoi.
Ajo shpjegoi se bashkëshorti ishte trashëgimtari me sipërfaqe toke më të madhe. “113 m2 i ka pasur si trashëgimtar. U bë një dhurim nga një prej tezeve për të gjithë nipat. Ka blerë 1 100 metra katorë nga bashkëpronarët e tjerë. Fatmir Bektashi kishte 140 metra, Xhimi Begeja rreth 500 metra, ky (Jamarbër Malltezi) kishte 1 500 metra”, tha.
Argita Malltezi tha se një sasi e konsiderueshme monetare është investuar në kompani nga bashkëshorti i saj, që ishte përfituar përmes një vendimi gjyqësor. Ajo bëri me dije se në gjyq u kundërshtuan pikërisht veprimet jo ligjore të ish-kryebashkiakut të Tiranës, Edi Ramës. Ky i fundit, tha ajo, pasi mësoi se bashkëshorti i saj ishte pjesë e investimit te ish-kompleksi “Partizani”, pengoi në formë jo ligjore projektin e investimit.
