Një 35-vjeçar i identifikuar si, Andi Lala, humbi jetën një ditë më parë në Durrës, teksa ishte duke prerë pemët e qytetit. Lala ishte punëtor i firmës Alb Steel-Construction, e cila ka reaguar lidhur me ngjarjen në fjalë.
Përfaqësuesi ligjor i firmës, Enea Cenko, në një prononcim për Fax Neës, është shprehur se ngjarja ka ndodhur jashtë objektit ku po punohej. Cenko deklaron se 35-vjeçari, është thirrur nga pronari i një tjetër hoteli në afërsi për t’a ndihmuar me heqjen e një palme.
Punëtori pasi ka dalë nga perimetri i objektit ku po punonte, bashkë me kolegun e tij, kanë shkuar në një objekt tjetër aty afër, ku i ishte kërkuar ndihmë dhe aty ka ndodhur ngjarja e rëndë, ku fatkeqësisht i riu humbi jetën.
Sipas avokatit, kjo firmë respekton të gjitha rregullat e sigurisë teknike në punë dhe gjithçka ka ndodhur jashtë kantierit të saj.
Ndërkohë kujtojmë se lidhur me ngjarjen janë vënë në pranga drejtuesi teknik i firmës Enrik Mahmutaj, 33 vjeç, dhe drejtuesi i vinçit nga i cili ra i riu, Blerim Margeshi, 42 vjeç.
