Sheshi i Derviçanit në Dropull në Dropull do të mbajë emrin e Konstantinos Mitsotakis, i pari kryeministër i Greqisë që vizitoi Shqipërinë. Këtë të premte, u zbulua edhe busti në nder të tij në një ceremoni ku i pranishëm ishte edhe kryeministri Edi Rama.
Rama e nisi greqisht fjalimin e përgatitur enkas për eventin. “Agapiti filoi, agapites files motra e vëllezër, adhelfes qe adhelfia, Sot e kujtojmë dhe kremtojmë me vendosjen e bustit, jetën e një personazhi historik të Greqisë fqinje”, çeli ligjërimin kreu i qeverisë, i cili më tej foli me superlativa për ish-kryeministrin grek Konstantinos Mitsotakis – babai i kreut të qeverisë aktuale të Greqisë, Kyriakos Mitsotakis.
Kjo nismë e Ramës vjen në një moment kur marrëdhëniet mes Tiranës dhe Athinës zyrtare janë në pikën më të ulët prej vitesh. Shkak është bërë mbajtja në qeli e Fredi Belerit, përfaqësues i minoritetit grek në vendin tonë. I arrestuar dy ditë përpara zgjedhjeve vendore të 14 majit me akuzën e korrupsionit aktiv në zgjedhje, Fredi Beleri nuk është lejuar të betohet si kryebashkiaku i zgjedhur i Himarës më 14 maj.
“Heqja e mundësisë së Fredi Belerit për t’u betuar si kryetar bashkie, përbën sipas mendimit tonë, shkelje të qartë të standardeve të shtetit ligjor”, është shprehur më herët Mitsotakis.
Edi Rama, nga ana tjetër, pretendon se çështja e kryebashkiakut të zgjedhur të Himarës – që ka ngritur dyshime të forta se është nisur për shkak të interesave politike – i përket organeve të drejtësisë shqiptare dhe se ai nuk mund të pranojë asnjë ndërhyrje ndaj saj.
