Teuta i është kthyer dje stërvitjes pas asaj fitoreje dramatike me përmbysje kundër Dinamos në javën e fundit të fazës së parë.
Skuadra e Edi Martinit ka përpara një tjetër transfertë, këtë herë kundër kampionëve në fuqi të Partizanit, të vlefshme për javën e 10-të.
Mirëpo, këto dy skuadra kanë mes tyre edhe një ndeshje të prapambetur nga java e parë, e cila nuk është vendosur ende se kur do të zhvillohet.
Duke qenë se stadiumi “Niko Dovana” i Durrësit nuk është ende gati pas procesit të rimbjelljes së barit, takimi që është në kalendar, Teuta-Partizani, do të zhvillohet të shtunën në orën 17:00 në stadiumin e të kuqve, “Arena e Demave”.
Klubet kanë rënë dakord për këtë shkëmbim në kalendar, duke marrë edhe miratimin e FSHF. Kësisoj, në momentin kur të caktohet edhe data e zhvillimit të ndeshjes së prapambetur, Partizani-Teuta, për javën e parë, atëherë ky takim do të zhvillohet në Durrës.
Trajneri Martini pritet të ketë të gatshëm për ndeshjen e së shtunës të gjithë grupin, teksa rikthehet nga pezullimi edhe kapiteni Blerim Kotobelli, i cili mungoi kundër Dinamos.
Teuta do të kërkojë të ndalë vrullin e Partizanit, që aktualisht ndodhet në vendin e dytë. Durrsakët janë të karikuar për të mos dalë pa pikë në “Arenën e Demave”, edhe pse vështirësitë e kësaj ndeshjeje janë prezente, për më tepër që përballë janë të kuqtë.
