Avokati i Popullit ka reaguar lidhur me ngjarjen e rëndë e ndodhur në Vlorë disa ditë më parë, ku një 26-vjeçare u përdhunua nga tre persona.
Organi i mbrojtjes ka bërë thirrje për vendosjen para përgjegjësisë të të gjithë atyre që kanë kryer dhe mbështetur aktin ndaj të resë.
Në njoftimin zyrtar bëhet thirrje për mbrojtjen e fjalës së gazetarëve, referuar rastit të kërcënimit të gazetares së Vlorës Afrovita Hysaj. Në deklaratën e tij Avokati i Popullit e quan sulm për një shoqëri demokratike, kërcënimin që është bërë ndaj medias dhe inkurajon profesionistët të vijojnë detyrën e tyre.
Deklarata e plotë:
“Avokati i Popullit ka përcjellë me shqetësim ngjarjen e ditëve të fundit të ndodhur në qytetin e Vlorës, ku është shënuar rasti i rëndë i përdhunimit të një vajze 26 vjeçare.
Referuar rrethanave të bëra publike në media kjo është një ngjarje shumë e rëndë ndaj së cilës duhet të ketë një reagim të gjerë qytetar dhe reflektim të thellë publik.
Avokati i Popullit i inkurajon organet ligjzbatuese që ta zbardhin me përparësi rastin dhe të ndërmarrin hetime të shpejta dhe sa më efektive për vënien para përgjegjësisë të personave që e shkaktuan këtë ngjarje të dënueshme.
Ndërkohë, sikurse është bërë me dije në opinionin publik, të tjera incidente janë shënuar në lidhje me këtë rast, që përfshijnë përdorimin e dhunës verbale, gjuhës denigruese dhe kërcënimit për jetën drejtuar gazetares Afrovita Hysaj, e cila ka raportuar mbi ngjarjen e rëndë.
Avokati i Popullit, dënon ashpër çdo formë që cënon lirinë e shprehjes, të cilën nuk e konsideron një privilegj por një të drejtë themelore.
Sulme të tilla në një shoqëri demokratike janë të pajustifikuara dhe cënojnë ndër të tjera kurajon profesionale për gjurmimin e së vërtetës.
Në sferën e lirisë së shprehjes, Avokati i Popullit është i angazhuar për të siguruar që kjo e drejtë themelore të mbetet e pacënuar, duke i inkurajuar të gjithë profesionistët e medias ta sfidojnë padrejtësinë dhe t’i japin zë mbrojtjes së të vërtetës.”
