Një 29-vjeçar është arrestuar ditën e sotme pasi akuzohet se ndihmonte në kalimin e emigrantëve në mënyrë të paligjshme.
Blutë bëjnë me dije se i riu ishte shpallur në kërkim pasi rreth 5 muaj më parë, kishte bashkëpunuar me 3 shtetas të tjerë, për të transportuar nga Saranda në Memaliaj, disa emigrantë, me qëllim kalimin ilegal të kufirit.
“Si rezultat i hetimeve të kryera nga specialistët për Hetimin e Trafiqeve të Paligjishme dhe Narkotikëve të DVP Gjirokastër, si dhe i veprimeve operacionale të koordinuara me specialistët e Policisë Kufitare të PKK Rinas, u kap në PKK Rinas, shtetasi i shpallur në kërkim 29 vjeç, banues në Dibër.
Gjykata e Shkallës së Parë e Juridiksionit të Përgjithshëm Gjirokastër i ka caktuar 29-vjeçarit, masën e sigurisë “Arrest në burg”, për veprën penale “Ndihma për kalim të paligjshëm të kufijve”, pasi më datë 17.05.2023, dyshohet se ka bashkëpunuar më 3 shtetas të tjerë, për të transportuar 4 emigrantë nga Banglandeshi, që ata të kalonin kufirin, në kundërshtim me ligjin”,- njofton Policia.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Gjirokastër, për veprime të mëtejshme.
