Mbetet në fuqi masa e sigurisë “Detyrim Paraqitje” për kryedemokratin Sali Berisha dhe bllokimi i pasaportës që e ndalon ish-kryeministrin të dalë jashtë territorit të Shqipërisë në kuadër të hetimeve për privatizimin e ish-klub “Partizanit”.
Sali Berisha do të duhet të paraqitet 2 herë në muaj në BKH. Sipas vendimit të gjykatës ish-kryeministri duhet të shkojë në zyrat e Byrosë Kombëtare të Hetimit në datat 6 dhe 20 nëntor.
Në njoftim e GJKKO theksohet: “Urdhërohet shtetasi nën hetim Sali Berisha, të paraqitet të hënën e parë dhe të tretë të çdo muaji, ora 10:00 para oficerit të policisë gjyqësore Adelajda Metaj, pranë Prokurorisë së Posaçme kundër Korrupsionit dhe Krimit të Organizuar“.
Mësohet se avokatet Rabije Cenali dhe Jalldis Kastrati edhe pse kanë pranuar fillimisht të bëjnë përfaqësimin ligjor në gjykatë, gjatë seancës kanë vendosur të tërhiqen. Të pyetur nga gazetarët, ato mohuan kategorikisht se kanë pasur kërcënime.
Ende nuk dihen arsyet se pse dy avokatet vendosën të tërhiqen në minutat e fundit, ndërsa është përfaqësuar në seancë nga një tjetër avokate.
Dy avokatet kërkuan dy ditë kohë të njihen me dosjen, por gjykata u ka dhënë vetëm disa orë. Emri i Valentina Todoreskut ka dalë në dritë pas përfundimit të seancës.
“Mbrojtësit e caktuar kryesisht nuk morën përsipër realizimin e mbrojtjes dhe në këto kushte, referuar listës së avokatëve kryesisht, gjykata caktoi si avokate kryesisht av.Valentina Todoresku, të cilës i la kohën e nevojshme për tu njohur me aktet e kërkesës me objekt marrjen në pyetje të shtetasit nën hetim Sali Berisha”, thuhet në njoftimin e Gjykatës.
GJKKO bën me dije se rrëzuar kërkesën e Sali Berishës për të përjashtuar gjyqtaren Irena Gjoka nga gjykimi për ish-kryeministrin për këtë çështje.
Njoftimi nga GJKKO:
“– Në datën 26.10.2023, ora 15.00, në Gjykatën e Posaçme të Shkallës së Parë për Korrupsionin dhe Krimin e Organizuar, u riçel seanca gjyqësore për vijimin e shqyrtimit të kërkesës së paraqitur nga Prokuroria e Posaçme, me objekt “Marrjen në pyetje të shtetasit nën hetim Sali Berisha”.
– Të pranishëm në sallën e gjykimit ishin prokurorët Arben Kraja dhe Enkeleda Millona, ndërsa i hetuari Sali Berisha u përfaqësua nga mbrojtësit e caktuar kryesisht nga gjykata, av.Rabije Cenalia dhe av.Jalldiz Kastrati.
– Gjykata bëri me dije se pranë kryesekretarisë së kësaj gjykate, ditën e sotme, datë 26.10.2023, ora 09.45, është depozituar një kërkesë nga shtetasi Sali Berisha, me objekt përjashtimin e gjyqtares nga gjykimi i kësaj çështje.
Mbi këtë kërkesë, me vendimin nr.430 Akti, datë 26.10.2023 të GJKKO është vendosur mospranimi i kërkesës së kërkuesit Sali Berisha, me objekt përjashtimin e gjyqtares Irena Gjoka, si të pabazuar në prova dhe në ligj.
– Mbrojtësit e caktuar kryesisht nuk morën përsipër realizimin e mbrojtjes dhe në këto kushte, referuar listës së avokatëve kryesisht, gjykata caktoi si avokate kryesisht av.Valentina Todoresku, të cilës i la kohën e nevojshme për tu njohur me aktet e kërkesës me objekt marrjen në pyetje të shtetasit nën hetim Sali Berisha”, thuhet në njoftim.
