GJKKO ka rrëzuar kërkesën e avokatëve të Sali Berishës për përjashtimin e gjyqtares Irena Gjoka nga çështja penale në ngarkim të kreut të PD-së lidhur me privatizimin e ish-kompleksit sportiv “Partizani”.
Më herët gjatë ditës, avokatët e zgjedhur nga Sali Berisha për të përfaqësuar në gjykatë, Genc Gjokutaj dhe Sokol Mëngjesi depozituan në GJKKO kërkesën për përjashtimin e gjyqtares Irena Gjoka.
Kërkesa u shqyrtua nga gjyqtarja tjetër Flora Hajredinaj, e cila vendosi rrëzimin e saj.
Më herët, gjyqtarja Gjoka është kallëzuar në SPAK për “shpërdorim detyre” nga Berisha. Sipas kryedemokratit dhe avokatëve të tij, masa e sigurisë e dhënë për Berishën është në kundërshtim me ligjin. Berisha është shprehur se sipas parashikimeve kushtetuese, kërkesa për masë sigurie për të duhet të kalonte më parë nga institucioni i Kuvendit.
Argument që Berisha e përsëriti edhe gjatë një konference për mediat këtë të enjte, teksa hodhi akuza ndaj gjyqtares Irena Gjoka.
“Gjykatësja me urdhër të Edi Ramës po kërkon të krijojë një precedent të tmerrshëm që nuk ka ndodhur kurrë. Të shkruajë Kushtetutën në tavolinën e saj. Ky është mercenarizëm ekstrem. Nuk shkruhet Kushtetuta. Kushtetuta zbatohet. Asnjë ligj, asnjë person, asgjë nuk mund të dalë mbi Kushtetutën”, tha.
“Ja çfarë thotë neni 73, pika 2: Deputeti nuk mund të arrestohet ose t’i hiqet liria në çfarëdo forme, apo ndaj tij të ushtrohet kontroll personal ose i banesës pa autorizimin e Kuvendit. Ja çfarë thotë neni 73, pika 2: Deputeti nuk mund të arrestohet ose t’i hiqet liria në çfarëdo forme, apo ndaj tij të ushtrohet kontroll personal ose i banesës pa autorizimin e Kuvendit. Po deshe ju lexoj nen tjetër, ky nuk është vetëm për deputetët, është për të gjithë qytetarët: Askush nuk mund të pengohet të dalë lirisht jashtë shteti. Thotë neni 38, pika 2. Nëse ti pranon të rrëzojmë Kushtetutën, atëherë hajde të rrëzojmë Kushtetutën. Të rrëzojmë Kushtetutën, kjo nuk ndodh”, shtoi ai.
Duke iu referuar caktimit të Artan Simonit si avokat kryesisht për të, Berisha tha se vendimi nga gjyqtarja Gjoka u mor me urdhër të kryeministrit Edi Rama.
“A e patë kë zgjodhi ajo? Po ajo ishte fenomenale? Sikur ta porosisja unë. Atë Kmerin e Kuq. Ajo ishte gjëja më e bukur. Ajo e përzgjodhi. Edi Rama ia çoi. Edi Rama ia nisi, do u them edhe personin që ua nisi. Edi Rama ia çoi, ku e njihte ajo… Ajo çdo gjë e komunikon me Ramën, me Encrochat apo me çfarë mjeti, nuk mund të them tani, por ajo komunikon me Ramën”, tha Berisha.
Gjatë konferencave për mediat përgjatë ditëve të fundit, ai ka argumentuar pse akuzat e prokurores së SPAK Enkelejda Millonai ndaj tij janë politike.
Ndërkohë, pas tensioneve të së Mërkurës në sallën e gjyqit, gjyqtarja Irena Gjoka vendosi që seanca për masën e sigurisë ndaj Berishës të zhvillohet me avokatë të caktuar kryesisht.
