Presidenti i Republikës, Bajram Begaj, ktheu për rishqyrtim në Kuvend ndryshimet në ligjin “Për Shtetësinë” të miratuar nga Kuvendi muajin e kaluar.
Mospërputhmësia e kushtetutshmërisë, sipas kreut të shtetit, lidhet me amendamentet e ligjit të ri. Ai vlerëson se për tu miratuar, kanë nevojë për shumicë të cilësuar, ndërkohë disa prej tyre rezulton të jenë miratuar me shumicë të thjeshtë.
“Në analizë të Kushtetueshmërisë, shtesat dhe ndryshimet ligjore të përcjella për shpallje, janë pjesë e ligjit nr.77/2023 “Për disa shtesa dhe ndryshime në ligjin nr. 113/2020, “Për shtetësinë””, që sipas nenit 81, pika 2, shkronja “b” të Kushtetutës së Republikës së Shqipërisë, miratohet me shumicë të cilësuar prej 3/5 të të gjithë anëtarëve të Kuvendit, minimalisht 84 vota. Nga procesverbali i seancës plenare të datës 21.9.2023 dhe të dhënave të votimit elektronik konstatohet se miratimi i amendamentit të dytë është bërë me 78 vota, i amendamentit të tretë me 77 vota, i amendamentit të katërt me 78 vota dhe i amendamentit të pestë me 79 vota. Për një ligj për të cilin Kushtetuta ka parashikuar miratimin me shumicë të cilësuar, konkretisht 84 vota, këto amendamente nuk e kanë marrë numrin e kërkuar të votave dhe nuk mund të quhen të miratuara. Për nga përmbajtja dispozitat e reja nuk bien në kundërshtim me dispozita substanciale të Kushtetutës. Dispozitat e ligjit kryesisht krijojnë lehtësira për marrjen e shtetësisë shqiptare, masa dhe lloji i të cilave është në gjykimin sovran të Kuvendit”, thuhet në argumentin e Presidencës.
Ndryshimet në ligjin “Për Shtetësinë” u bënë nga qeveria që arsyetoi se qëllimi ishte lehtësimi i procedurave për të marrë shtetësinë shqiptare. U argumentua se një prej fushave ku do të sillte benefite ky ligj ishte sporti, duke iu krijuar mundësinë talenteve që kanë lindur e jetojnë jashtë Shqipërisë që të pajisen me pasaportën shqiptare me më pak procedura burokratike.
