Deputetja e PD-së Jorida Tabaku po mban një pozicion të baraslarguar nga të gjitha palët në PD. Ajo njeh Gazment Bardhin dhe jo Lulzim Bashën si kryetar të grupit parlamentar, por në një intervistë pranoi se ka zgjedhur të mos marrë pjesë në mbledhjet e përbashkëta të grupit Bardhi me grupin Berisha.
Tabaku i shmang qëndrimet për emrat dhe përpiqet të fokusohet tek parimi. Në këtë rast, tek domosdoshmëria për bashkim.
“Po, është e vërtetë, nuk kam marrë pjesë në mbledhjet e grupit. Nëse ne nuk e kuptojmë që të ndarë në pjesë, i bëjmë shërbim vetëm qeverisë, atëherë nuk kemi kuptuar asgjë. Ne, megjithëse mendojmë ndryshe, duhet patjetër të mobilizojmë këdo në opozitë dhe të veprojmë si një grup edhe në parlament, edhe në terren, pasi 14 maji tregoi që copëzat e ndryshme të opozitës, edhe të gjitha bashkë, nuk morën dot sa qeveria” u shpreh Tabaku.
Por në kushtet kur Gazment Bardhi fton për bashkëpunim Lulzim Bashën, por ai refuzon për shkak të Berishës, a nuk duket kërkesa për bashkim të të gjithëve jashtë realitetit?
“Gjithçka ndodh, kur ka vullnet. Por me teorinë e ndasive, e sulmeve, e përjashtimeve, do të përsërisim veten deri në pafundësi. Mendoj që të gjithë në opozitë duhet të bashkohemi. I heqim emrat, i heqim emërtesat. Janë deputetë të opozitës dhe duhet të jenë bashkë një grup i vetëm në parlament. Nuk kanë rëndësi egot personale, por interesi i demokratëve”, – theksoi Jorida Tabaku, e cila nuk pranon se kjo kërkesë duket e pamundur dhe jorealiste.
“Është e vështirë në këtë moment, por duke parë gabimet e së shkuarës, duke parë se ku ndodhet PD, kjo është rruga përpara.”- tha Jorida Tabaku për emisionin “Pa Censurë” në RTSH.
