Deputetët e Partisë Demokratike kanë dalë nga Kuvendi, pas disa orësh të ngujuar ku nuk lejuan zhvillimin e seancës së sotme plenare, në shenjë proteste për shkak se mazhoranca rrëzoi kërkesat për ngritjen e komisioneve hetimore dhe nuk miratoi ndryshimet për përbërjen e komisionit të reformës zgjedhore.
Për shkak të bllokimit të seancës së sotme, Komisioni i Etikës përjashtoi për 10 ditë 26 deputetë të PD. Në një prononcim për mediat, kreu i grupit parlamentar të PD, Gazment Bardhi ka deklaruar se ata nuk e njohin vendimin e përjashtimit për deputetëve.
Bardhi u shpreh se urdhri për përjashtimin e tyre është dhënë nga Edi Rama dhe është i pavlefshëm, ndërsa lajmëroi se të gjithë deputetët, përfshirë edhe ata të përjashtuarit, do të marrin pjesë në seancat e ardhshme dhe komisionet parlamentare.
“Pas diskutimeve kemi vendosur të vijojmë aksionin tonë opozitar për të kthyer parlamentin në zbatimin e rregullave. Kemi konstatuar pavlefshmërinë e urdhrit të Edi Ramës për të përjashtuar nga veprimtaria parlamentare të deputetëve. U kërkojmë këtyre që firmosin të mësojnë edhe matematikën e klasës së parë, pasi thonë se na përjashtuan për 10 ditë, kur në fakt afati del 11 ditë. Kjo tregon sa të verbër janë kur firmosin. Mazhoranca dhe grupi i PS t’i kthehen arsyes dhe zbatimit të kushtetutës. Patjetër që do vijmë në seancë dhe do marrim pjesë në çdo mbledhje komisionesh. Çdo kërkesë e jona është e drejtë. Rama nuk na do në parlament, por ne do jemi në parlament”, u shpreh ai.
