Një 36-vjeçar shqiptar, është arrestuar në Itali, pasi akuzohet për transportim narkotikësh.
Mediat e huaja shkruajnë se shqiptari u arrestua nga seksioni i antidrogës së policisë së Ravenës më 13 tetor pranë pyllit me pisha në ‘Punta Marina’. Raportohet se shqiptari parkoi skuterin dhe u nis drejt pemëve duke mbajtur një çantë shpine mbi supet e tij, me nëntë pako heroinë, gjithsej 5 kg drogë.
Oficerët e Antidrogës kishin disa kohë që e ndiqnin 36-vjeçari, dhe kanë nisur aksionin kur kanë parë atë duke parkuar motorin.
Me të parë policët, shqiptari ka hedhur çantën e shpinës dhe tentoi të arratisej, por është ndaluar dhe arrestuar.
Nga kontrolli i mëpasshëm i shtëpisë u sekuestruan 13 mijë euro kesh, që dyshohet se ishte fitimi i aktivitetit të trafikut të drogës.
