Tre të mitur kanë arritur të përfitojnë një shumë prej 30 mijë euro duke mashtruar persona të ndryshëm në rrjetet sociale.
Skema ishte e tillë: Ata krijonin llogari me të dhëna të falsifikuara të shtetaseve të ndryshme dhe me anë të postimeve në këto profile, premtoheshin favore seksuale kundrejt pagesave të ndryshme. Administratorët e këtyre profileve kërkonin nga të interesuarit që pagesa të kryhej në disa vendndodhje të përcaktuara prej tyre, i merrnin paratë pasi i orientonin të interesuarit për vendet ku duhej të lihej pagesa dhe më pas largoheshin duke i bllokuar personat në llogaritë e tyre, në rrjetet sociale ku komunikonin.
Këtë të mërkurë, policia e Tiranës njoftoi procedimin e tre autorëve, të moshave 16 dhe 17 vjeç në kuadër të operacionit “Takimi”.
Sipas hetimeve nga efektivët e Sektorit për Hetimin e Krimeve Kibernetike në DVP Tiranë, janë dokumentuar rreth 150 raste të kësaj skeme mashtrimi.
Hetimet, sipas bluve, nisën pasi “gjatë monitorimeve të rrjeteve sociale dhe burimeve te hapura, kanë konstatuar llogari të ndryshme me të dhëna të dyshuara të falsifikuara”.
“Gjatë monitorimeve të këtyre llogarive janë konstatuar publikime të ndryshme në të cilat premtoheshin favore seksuale kundrejt pagesave të ndryshme monetare, dhe menjëherë është organizuar puna për vënien para përgjegjësisë ligjore të personave përgjegjës, të kësaj skeme mashtrimi kompjuterik”, shtuan të njëjtat burime.
Hetuesit kanë siguruar pamje kur personat që kanë rënë pre e mashtrimeve kanë dorëzuar shumat monetare në lokacionet që u diktonin të miturit. Po ashtu edhe bisedat në rrjetet sociale mes personave të rënë pre e mashtrimit dhe adoleshentëve si dhe postimet false të këtyre të fundit ku ata reklamonin shërbime seksuale kundrejt pagesës.
Një skemë e tillë është përdorur edhe më herët nga të tjerë persona të proceduar, duke mashtruar me ‘karremin’ e marrëdhënieve seksuale kundrejt pagesës.
DVP Tiranë u bën thirrje qytetarëve që nëse do të konstatojnë profile të tilla nëpër rrjete sociale, të paraqiten në Sektorin për Hetimin e Krimeve Kibernetike, në DVP Tiranë.
