Kryeministri Edi Rama do të jetë ditën e premte në Angli ku pritet të zhvillojë një takim me homologun e tij Rishi Sunak. Çështja kryesore e takimit pritet të jetë çështja e emigrantëve dhe marrëveshja për të burgosurit që të kalojnë dënimin në Shqipëri.
Burime për A2 CNN bëjnë të ditur se Rama do të fluturojë të enjten drejt Britanisë së Madhe, në të njëjtën ditë kurnë Kuvend do të diskutohet për rezolutën rreth ngjarjeve të fundit në Kosovë.
Demokratët kanë kërkuar prezencën e kryeministrit Edi Rama, por megjithatë mbetet për t’u parë nëse kreu i qeverisë do të jetë prezent. Megjithatë, siç shprehen edhe socialistët, kryesocialisti mund të jetë prezent në sallë në fillim të seancës.
Kuvendi do të zhvillojë nesër një seancë të Posaçme, për të diskutuar për 5 orë rresht ngjarjet e ndodhura në veri të Kosovës, pas sulmit terrorist të 24 Shtatorit në Banjskë ku humbi jetën polici shqiptar, Afrim Bunjaku dhe u plagosën 2 të tjerë. Vendimi u mor paranjë jave në mbledhjen e Konferencës të kryetareve.
PS ka propozuar një rezolutë ku shpreh shqetësimi për situatën e krijuar pas sulmit ushtarak të një njësie terroristësh serbë. Rezoluta shpreh mbështetje për sovranitetin dhe integritetin territorial të Kosovës, por edhe paqen dhe sigurinë në rajon.Mes të tjerash në rezolutë thuhet se Serbia duhet të heqë dorë nga veprimet armiqësore e luftënxitëse ndaj Kosovës dhe të hapë një hetim serioz ndaj të gjithë organizatorëve. Ndërkaq edhe PD, përmes kreut të grupit parlamentar të saj ka propozuar një tjetër rezolutë për ngjarjet në Veri.
