“Një tentativë për trembje dhe për të na frikësuar”
Kështu e ka konsideruar arrestimin e tij, ish-luftëtari i UÇK-së, Dritan Goxhaj, pasi ka folur për mediat pas daljes nga qelia, pas vendimit të sotëm të Gjykatës së Apelit, ku gjyqtari Genti Shala rrëzoi vendimin e Gjykatës së Tiranës, duke refuzuar ekstradimin e tij në Kosovë dhe shuar masën e sigurisë “arrest me burg” ndaj tij.
Goxhaj u shpreh se lirinë nuk e ka humbur asnjëherë as ai, as UÇK-ja dhe as ish-krerët e saj, të cilët ndodhen sot në burgun e Hagës.
“Lirinë nuk e kishim humbur asnjëherë. Pra, nuk e kisha humbur lirinë as unë, as UÇK-ja dhe as ata të tjerët që janë në Hagë. Thjesht ishte një tentativë për të na trembur, për të na friksuar, për të na hequr nga rruga jonë dhe për të na mbushur mendjen se nuk ishim në një rrugë të drejtë. Por, fakti që sot, më gjithë përpjekjet e kësaj reformës në drejtësi, për të hequr nga sistemi i gjykatës të aftë edhe patriotë, fatmirësisht nuk ia ka arritur asaj gjëndje. Sot arritëm të tregojmë sërish që jemi në rrugën e drejtë dhe kemi luftuar drejtë. Faleminderit të gjithëve dhe gjithë medias për mbështetjen deri më sot.” – u shpreh Dritan Goxhaj.
Dritan Goxhajt, ish-luftëtar i UÇK-së, është ndër të paktët që shkuan nga Shqipëria për të luftuar në Kosovë (së bashku me të atin, kolonelin Dilaver Goxhaj). Goxhaj i është bashkuar UÇK-së si oficer i Ushtrisë Shqiptare në shkollën e aviacionit dhe ka pasur autorizimin e Shtabit të Përgjithshëm që të mbante kontakte me komandën e forcave amerikane në Shqipëri.
Ai akuzohej nga Prokuroria Speciale e Hagës për kryerjen e veprave penale “Frikësimi gjatë procedurës penale” dhe “Pengimi i personit zyrtar në kryerjen e detyrave zyrtare”, parashikuar nga legjislacioni penal i Republikës së Kosovës.
Vendimi i Gjykatës
Referuar raportimeve të mëparshme në media, Gjykata e Apelit të Juridiksionit të Përgjithshëm, informon sa më poshtë:
Gjykata e Shkallës së Parë e Juridiksionit të Përgjithshëm Tiranë, ka zhvilluar gjykimin lidhur me lejimin e ekstradimit ndaj shtetasit me iniciale D.G, nga Shqipëria në Kosovë (Dhomat e Specializuara të Kosovës).
Gjykata e Shkallës së Parë e Juridiksionit të Përgjithshëm Tiranë, me vendimin nr. 1204 Akti, datë 19.09.2023, ka vendosur:
– Pranimin e kërkesës .
– Lejimin e ekstradimit të shtetasit shqiptar D.G nga Shqipëria në Kosovë (Dhomat e Specializuara të Kosovës).
Çështja në apel u shqyrtua mbi bazën e ankimit të bërë nga shtetasi me iniciale D.G, i cili kërkoi prishjen e vendimit të gjykatës së shkallës së parë, deklarimin e pafajshëm dhe moslejimin e ekstradimit nga Shqipëria në Kosovë (Dhomat e Specializuara të Kosovës).
Në përfundim të gjykimit në apel, sot më datë 10.10.2023, Gjykata e Apelit të Juridiksionit të Përgjithshëm, e përbërë nga trupi gjykues me Gjyqtar z. Genti Shala, vendosi:
-Ndryshimin e vendimit Nr. 1204 Akti, datë 19.09.2023, të Gjykatës së Shkallës së Parë të Juridiksionit të Përgjithshëm Tiranë.
– Rrezimin e kerkeses per ekstradimin e shtetasit D.G nga Republika e Shqiperise ne Republiken e Kosoves.
– Heqjen e mases se sigurimit “arrest ne burg “, per shtetasin D.G, caktuar me vendimin Nr. 1123 Akti, date 20.07.2023 te Gjykates se Shkalles se Pare te Juridiksionit te Pergjithshem Tirane.
-Urdherohet lirirmi i shtetasit Dritan Goxhaj, nese nuk mbahet per ndonje veper tjeter penale.
