Zëdhënësi i qeverisë së Kosovës, Përparim Kryeziu ka konfirmuar për mediat në Kosovë pjesëmarrjen e kryeministrit Albin Kurti në Samitin e Procesit të Berlinit që do të zhvillohet në Tiranë më 16 Tetor.
Së fundmi marrëdhëniet mes dy kryeministrave Edi Rama dhe Albin Kurti kanë qenë të ftohta.
Qeveria shqiptare anuloi pjesëmarrjen në mbledhjen e përbashkët mes dy qeverive që pritej të zhvillohej në Gjakovë këtë vit. Ndërkohë gjatë një turi që mori kryeministri Edi Rama në vendet e rajonit, nuk u prit nga Kryeministri Albin Kurti kur shkoi në Prishtinë.
Axhenda e samitit
Referuar axhendës së samitit, pritja do të bëhet në orën 11:00 nga kryeministri Edi Rama tek Piramida, vendi ku do të mbahet Samiti. Hapja e samitit do të bëhet në orën 11.30, ku do te flasin fillimisht kryeministri Edi Rama, më pas kancelari gjerman Olaf Scholz, presidentja e Komisionit Europian Ursula von der Leyen e më pas presidenti i Këshillit Europian, Charles Michel.
Në orën 17.45 do të mbahet konferenca e përbashkët mes kryeministrit Rama, presidentes së Komisionit Europian, Ursula von der Leyen dhe kancelarit gjerman Olaf Scholz.