Janë zbardhur detaje të reja nga arrestimi i dy personave ditën e djeshme në pikëm kufitare të Kapshticës, të cilët do të trafikonin armë zjarri dhe municion, nga Shqipëria në drejtim të Greqisë.
Në pranga u vunë shtetasit Xhimi Hoxha, 41 vjeç (i dënuar më parë për veprën penale “Moskallëzimi i krimit”) dhe Miklovan Veliu, 40 vjeç, të dy banues në Tiranë. Në automjetin e tyre tip “Benz”, të fshehura në sediljen e prapme. policia gjeti tre armë zjarri automatik, një pistoletë, pesë krehra me fishekë dhe një sasi municioni luftarak.
Burime bëjnë me dije se kontrollorët i kanë bërë pyetje shoferit, i cili ka shfaqur pasiguri dhe më pas automjeti u kalua në vijë të dytë për kontroll të detajuar, ku u zbuluan edhe armët. Po sipas të njëjtave burime mësohet se destiancioni i armëve ishte Selaniku.
Dy të arrestuarit janë marrë në pyetje nga Policia e Korçës, ku kanë mohuar se kishin lidhje me njëri-tjetrin për trafikimin e armëve, por grupi hetimor ka gjetur prova që faktonin bashkëpunimin mes dy të arrestuarve. Më konkretisht, në telefonin e njërit prej të arrestuarve janë gjetur mesazhe dhe video mes njëri-tjetrit kur sajonin vendin në automjet për të fshehur armët.
Videot e mesazhet janë administruar si prova materiale. Armët i kishte siguruar 41-vjeçari Xhimi Hoxha nga Tepelena, por me banim në Tiranë.
