Seanca e sotme plenare ka nisur me debate brenda Partisë Demokratike.
Kryeparlamentarja Lindita Nikolla ka nxehur situatën në momentin kur njohu Gament Bardhi si kreun e Grupit Parlamentar të Partisë Demokratike.
Basha ka reaguar ashpër nga foltorja e Kuvendit ndaj kryeparlamentares Lindita Nikolla për faktin se vazhdon të njohë ende Gazment Bardhin si kryetar të grupit parlamentar të PD dhe jo Flutura Açkën të caktuar prej tij.
Basha ka deklaruar se mazhoranca kërkon të ketë një opozitë si ajo e Kukësit, duke iu referuar zgjedhjeve të 24 shtatorit edhe pse ai vetë nuk nxorri kandidat. Ai ka akuzuar mazhorancën dhe grupin e kryedemokratit Berisha si “aleanca e kullave”.
“Më 4 tetor ju keni bërë një njoftim, u bë një muaj, që ky njoftim. Do bënit publik vendimin tuaj, fakti është që s’keni bërë asnjë vendim, merrni zvarrë përfaqësimin e PD, duke vendosur sipas qejfit dhe dëshirës dhe jo sipas kushtetutës dhe ligjit për partitë. Fshiheni pas një akti siç është rregullorja e kuvendit, e cila nuk ju jep asnjë të drejtë të vononi me një muaj vendimmarrjen për ti dhënë PD përfaqësimin që ka në kuvend. Sot flisni për vendime të grupit të PD, nuk ka, janë interpretimet tuaja të njëanshme. Dihet mirë pse i bëni, se kështu e doni opozitën pa grup të formalizuar. E doni siç e kishit në Kukës doni ta bëni gjithë Shqipërinë Kukës, por kjo nuk është në dorën tuaj. Jepni fund kësaj maskaradë është detyra juaj të shpreheni pro kushtetutës, pro ligjit për partitë politike, pro kodit zgjedhor siç e keni për detyrë. Nëse e keni vendosur në kulisat tuaja, aleancat me kullat e errëta ki guxim e thuaji shqiptarë që je pjesë e asaj aleancës së kullave”, tha Basha.
Ndërkohë Gazment Bardhi u shpreh se Basha duhet të japë “llogari” për katet që ka marrë në një nga kullat më të shtrenjta të Tiranës.
“Të jem i sinqertë u emocionova shumë nga kjo aleanca e kullave. Në fakt parafolësi është i vetmi që muajin e fundit ka marrë ja dy kate ne një kullë në një nga zonat më të shtrenjta të Tiranës dhe kur vjen këtu koleg për të akuzuar kolegët për aleanca kullash, numëro një herë katet e kullave të tua, në kullën më të shtrenjtë të Tiranës. Sa i takon grupit parlamentar të PD, ja ku janë deputetët e grupit parlamentar të PD, ti je i vetmi njeri në këtë sallë që je vetëshpallur kryetar partie dhe nuk guxon të mbledhësh grupin parlamentar të PD që ti kryeson, e di pse? Sepse je ti dhe 3 të tjerë që të vijnë nga pas. Nuk je as opozitë, as përfaqësues i PD, as përfaqësues i grupit parlamentar të PD, je thjeshte i rikthyer gjoja për të bërë opozitë, për atë e bën vetëm me kolegët e tu, se me këta mbrapa nuk ta mban” tha Bardhi.
Kaq ka mjaftuar që Basha të hedhë akuza të forta ndaj mazhorancës madje edhe ndaj kolegëve të tij demokratë për të cilët kërkoi të bëhet “veting” i politikës.
Përgjigjet Basha: “Prisja përgjigje nga ty dhe jo nga bashkëautorët. Për ata që kanë vendosur të bëjnë luftën e tyre personale në këtë sallë, kam një përgjigje, votoni vettingun në politikë, mos e ndytni gojën.”
