Mediat italiane kanë publikuar pamjet e momentit të aksidentit tragjik të autobusit në Venezia të Italisë, i cili ra nga ura e autostradës, nga një lartësi 10 metra dhe përfundoi mbi shinat e trenit duke shpërthyer në flakë.
Ngjarja e rëndë ndodhi pak pas orës 20:00 të mbrëmjes së të martës (3 tetor), ku mësohet se kanë humbur jetën të pakën 21 persona. Brenda mjetit ndodheshin një grup turistësh gjermanë, francezë, kroatë dhe ukrainas.
Mes 21 viktimave janë dy fëmijë të mitur dhe një foshnjë e porsalindur, ndërsa 15 persona raportohet se janë plagosur, pesë prej të cilëve në gjendje të rëndë për jetën.Viktimë e aksidentit tragjik ka mbetur edhe shoferi i autobusit elektrik, Alberto Rizzzotto, 40-vjeç nga Treviso.
Dyshimi kryesor i hetuesve është se shoferi, mund të jetë ndjerë keq dhe të ketë humbur vetëdijen, pasi në vendin e ngjarjes nuk ka patur shenja frenimi. Operacionet e kërkim shpëtimit të autoriteteve italiane përfunduan mëngjesin e sotëm, rreth orës 05:05.
Në një reagim të saj për aksidentin tragjik, Ministria e Jashtme shqiptare, përcolli ngushëllimet e saj për familjarët e personave që humbën jetën, ndërkohë që bëri me dije se nuk ka pasur raporte për shqiptarë mes viktimave.
