Kreu i Prokurorisë së Elbasanit, Kreshnik Ajazi ka mbërritur ditën e sotme në ambientet e Prokurorisë së Posaçme ku po zhvillon takim me drejtuesit e SPAK dhe BKH-së.
Mësohet se në fokus të diskutimit është kalimi i dosjes “Never Forget” (Asgjë nuk harrohet) nga Prokuroria e Elbasanit në SPAK.
Burime për mediat bëjnë me dije se i penduari i drejtësisë Artan (Marjus) Tafani, veç vrasjeve dhe krimeve të tjera ka rrëfyer se Laert Haxhiu ka qenë i përfshirë dhe në trafikun e lëndës narkotike kokainë nga vendet e Amerikës Latine drejt Greqisë. Sipas Tafanit, Laert Haxhiu për këtë aktivitet kriminal ka bashkëpunuar me një grup kriminal në Fier dhe me një tjetër grup në Greqi.
Ngarkesat e kokainës kanë hyrë në Europë në kohë të ndryshme, ka rrëfyer Tafani dhe janë dërguar nga vende të Amerikës Latine me mbështetjen e një tjetër shqiptari që jeton në Greqi.
Pritet që drejtësia shqiptare të dërgojë letërporosi dhe të kryejë disa akt-ekspertiza për të provuar gjithçka thotë i penduari, Tafani. Pas takimit të sotëm pritet që dosjen “Never Forget” ta marrë në dorë SPAK-u.
