Banorët e Zall Herrit kanë dalë sërish ditën e sotme në protestë, duke bllokuar edhe rrugën me gurë, për të mos lejuar kalimin e kamionëve të tonazhit të rëndë, por dhe të automjeteve të tjera.
Ata kërkojnë shtrimin e rrugës, e cila është degraduar edhe më shumë nga kamionët e guroreve të zonës. Gjithashtu, ata kërkojnë edhe ujë të pijshëm. Sipas protestuesve, deputeti i zonë dhe kryetari i Bashkisë vijnë vetëm kur kanë zgjedhje për të marrë vota.
“Në maj deputeti ishte për fushatë këtu, dhe nuk flet. Njësia jonë vjen për të marrë lekët për ditë të hëne se ditë të tjera nuk vijnë në punë. Do rrimë këtu deri sa të zgjidhet problemi. Këtu jetojnë njerëz. Duam ujë dhe rrugë, dy çështje themelore. Ata thanë se turbullohet nga shiu, po sot që s’ka shi pse është i turbullt uji? Të gjithë këtë problem po e krijojnë kamionët. Nuk ka pasur asnjë reagim. Ka ardhur vetëm deputeti i zonës, kemi bërë një takim.”, tha një prej protestuesve.
Ndërkohë një e moshuar shtoi se; “I bëjmë thirrje Xhemal Qefalisë, deputetit, që të vijë këtu dhe të japë llogari, ose të lërë mandatin. Ata në shtëpinë e tyre, e kanë marrë nga këtu ujin dhe kanë, kurse unë s’kam pikë uji. Ne ja dhamë votën Veliajt me na ndihmuar, por jo Edi Ramës dhe Qefalinë, që të bëjnë ç’të duan. Na ndihmoni!”.
Ndërsa një tjetër u shpreh: “Ne nuk do të rrimë në heshtje”, duke paralajmëruar se protesta do të vazhdohet. Një banor tjetër shtoi: “Pronari i një prej guroreve thotë që ‘mua s’ke çfarë më bën’. Janë disa pronarë guroresh këtu.”
“Rruga është skandal, në Shqipëri s’ka rrugë më të keqe se kjo. Ne kërkojmë rrugën dhe ujin. S’kemi marrë asnjë përgjigje nga institucionet. Ne do të bllokojmë rrugën deri në fund. S’është as rrugë e gjatë, se pse nuk e bëjnë nuk e di. Kalojnë edhe shumë turistë në këtë rrugë po se çan kokën njeri fare. Kemi frikë të çojmë fëmijët në shkollë, sa të bjerë shi këtu nuk kalohet fare. Detyrohemi që ujin e pijshëm e blejmë pavarësisht se kemi Bovillën kaq afër sepse vjen i turbullt. Problemet me ujin kemi 5 vite që i vuajmë, këtu kalojnë 3 tuba, jeta është shumë e vështirë. I bëjmë thirrje autoriteteve të vijnë ta shohin dhe ta rregullojnë rrugën, s’kemi për të ndalur protestën. Duan të na shpopullojnë, pavarësisht se nga këtu kanë ikur shumë. Ne që kemi ngelur jemi pak, sepse s’duam të lëvizim. As 15 shtëpi kanë mbetur nga 50.”- tha banori tjetër nga Zall Herri.
Një tjetër banor u shpreh se ndonëse shtrimi i rrugës dhe problematika e ujit të pijshëm ishin pjesë e premtimeve elektorale, në zonën e Zall Herrit nuk ka shkuar askush që ta zgjidhë. Banorët u zotuan se do të protestojnë derisa kjo problematikë të gjejë zgjidhje.
“Gjatë këtij rrugëtimi, bëmë edhe një test se sa na përfaqëson kjo njësia jonë këtu, por ja që nuk rezultoi kështu. Na kanë kontaktuar gjithnjë sa herë që bëhen zgjedhjet, rezultoi krejt e kundërta. S’kemi hallin se ç’bëjnë ata, por për të diskutuar se çfarë do bëhet këtu. Jemi shumë të indinjuar, ne protestën. Premtime elektorale ka pasur shumë, ne s’kemi hall asgjë. Ne duam që të ngrihet një ekip ekspertësh të vlerësojnë ujin dhe problemin se nga bëhet turbullira. Por ne problemin më të madh e kemi me rrugën. Na erdhi një deputet këtu na tha që nuk e dinin sesi ishte rruga. Më duket paksa ofenduese që mos të dish sesi është rruga këtu kur mund ta kërkosh direkt nga Google. Megjithatë, ai mbase nuk do mandat tjetër, e ka hedhur lumin, e si i shkon kësaj pune… ne na ka mbetur kali”- tha banori tjetër.
Kjo nuk është hera e parë që banorët e kësaj njësie administrative protestojnë, për mungesë të infrastrukturës si dhe ujit të pijshëm.
