Nga Boldnews.al
Kryeministri Edi Rama pranoi publikisht dhe zyrtarisht se ka informacion që ndërtuesit shesin apartamente nga 2 mijë euro për metër katror dhe e deklarojnë në administratën fiskale me 850 euro për metër katror.
Kjo manovër e pretenduar nga kreu i Qeverisë është, më së paku, “fshehje e të ardhurave”, ose siç quhet ndryshe evazion fiskal. Por, po ashtu është edhe pastrim parash, një akuzë publike që qëndron mbi kokën e subjekteve të ndryshme, sidomos atyre që kanë ndërtuar në qendër të Tiranës.
Situata rëndohet akoma më shumë kur vetë kryeministri e ka këtë informacion dhe nuk ka lëvizur as gishtin e vogël për të marrë masa administrative apo për t’i referuar pranë organeve ligjzbatuese.
Pra, Rama tregoi se ai e di që në vendin e qeverisur prej tij ka subjekte që bëjnë evazion fiskal e pastrim parash dhe, maksimumi që bën, është kërcënimi në takime publike. Kjo sjellje është më së paku papërgjegjshmëri, ndërsa për opozitën është ortaktëri e kryeministrit me atë kategori biznesesh që kryejnë lehtësisht evasion fiskal dhe pastrim parash me kullat dhe ndërtimet e larta në qendrën e Tiranës.
Në një takim të zhvilluar paraditen e kësaj të Marte (3 tetor 2023) me përfaqësuesit e biznesit, Rama pati një shkëmbim replikash me një përfaqësues të sektorit të ndërtimit.
Sipërmarrësi iu ankua Ramës për ndryshimin e shpeshtë të taksave brenda vitit. Kryeministri, i cili deri në atë moment kishte marrë mesazhe servilosjeje nga një pjesë e të pranishmëve në tryezë, shfrytëzoi ankesën e ndërtuesit për të lëshuar “baterinë” e radhës kundër subjekteve private.
“Çfarë nuk kishit parashikuar ju, që shteti do ju thoshte që nuk mund të vazhdoni të deklaroni shitje shumë nën faktin, këtë nuk kishit parashikuar?! Kishit përgatitur një plan biznesi që do të gënjenit shtetin pa mbarim, dhe do të shisnit apartamente me 2 mijë euro dhe do i deklaronit të shitura me 850 euro? Këtë nuk e kishit parashikuar? Në plan biznesi e kishit edhe evazionin?
Nuk kishit parashikuar që shteti do të vinte momenti e të thoshte STOP! Që ju të shisni apartamente me 2 mijë – 3 mijë – 4mijë – 5 mijë euro, të shisni hapësira biznesi me 6 mijë euro – 7 – 8 mijë euro e të deklaroni atje çmime që janë larg së vërtetës nuk mund të vazhdojë. Çmimet e referencës, nuk janë vënë në mënyrë arbitrare, por në bazë të tregut”.
Pas 10 vitesh në pushtet, Rama “kërcënon” ndërtuesit se Shteti tashmë do të vijë në derën e tyre për t’i thënë “Stop!” evazionit fiskal në fushën e ndërtimit.
Por, ndërkohë, ai nuk deklaroi dhe as nuk duket se do të mbajë asnjë lloj përgjegjësie, të paktën morale dhe politike që qeveria e tij ka lejuar këtë informalitet, i cili herë pas here ka edhe nuanca kriminale, që zhvillohen në sektorin e ndërtimit në Shqipëri.
