Policia Rrugore e Tiranës vijon me “dorë të hekurt” ndaj të gjithë shoferëve që shkelin ligjin.
“Kontrollet janë fokusuar kryesisht te ata drejtues automjetesh që parkojnë në mënyrë të gabuar duke u bërë shkak për krijimin e trafikut të rënduar, ata që qarkullojnë me shpejtësi mbi normat e lejuara dhe ata që parakalojnë në mënyrë të gabuar, duke u bërë burim aksidenti“, njofton policia.
Vetëm gjatë javës që lamë pas, Policia Rrugore e Tiranës ka ndëshkuar me gjoba 12.607 drejtues automjetesh.
Prej ditësh uniformat blu kanë nisur një aksion duke “rrëmbyer” me karrotrec të gjitha automjetet që parkojnë gabim, me qëllim që qytetari të paguajë gjobën e majme prej 70 mijë lekësh të vjetra.
Tirana vitet e fundit është shndërruar në një qytet kaotik ku ndërtimet pa kriter të kullave dhe ngushtimi i rrugëve ia vështirëson jetën qytetarëve të cilët e kanë të pamundur për të parkuar automjetin e tyre.
