Superliga e volejbollit të meshkujve ka zhvilluar dje tri ndeshje, të vlefshme për javën e tretë të kampionatit. Partizani, Erzeni dhe Tirana kanë shënuar fitoret e radhës.
Të kuqtë e Ylli Tomorrit vijojnë ecurinë perfekte, teksa regjistruan tjetër sukses në shifra të pastra, duke mundur Studentin në derbi 0-3.
Partizanit i mjaftuan 1 orë e 10 minuta për ta likuiduar ekipin studentor në një takim të dominuar nga fillimi e deri në fund në “Asllan Rusi”. 11- 25, 16-25 dhe 16-25 ishte rezultati i seteve në favor të “demave”.
Ndeshje super e brazilianit të afruar së fundmi, Cardoso Almeida, protagonist i 22 pikëve për të kuqtë. Vijon të shkëlqejë gjithashtu edhe Raul Sabliqi, autor i 19 pikëve. Me këtë fitore Partizani ngjitet në kuotën e 9 pikëve, duke ruajtur vendin e parë, pa humbur asnjë set.
Me 9 pikë, por në vend të dytë, pozicionohet Erzeni, teksa shijakasit mundën dje Vllazninë 3-1 në “Dhimitraq Goga”. Skuadra e Ilia Kojës nuk fali në shtëpi, për të shënuar një tjetër rezultat të rëndësishëm ndaj një rivali jo të lehtë. Shijakasit fituan 25-16 në setin e parë, por Vllaznia reagoi mjaft mirë në të dytin, të cilin e fitoi 23-25.
Por më tej takimi nuk kishte më histori, pasi vendësit triumfuan bindshëm në dy setet e mbetura, përkatësisht 25-15 dhe 25-17, duke u shkaktuar humbjen e parë në kampionat shkodranëve.
Njeriu i ndeshjes ishte Anis Çullhaj, autor i 20 pikë për vendësit. Për kuqeblutë nuk mjaftoi i zakonshmi Nikolon Qafarena, 16 pikë për kapitenin në këtë sfidë.
Asnjë problem për Tiranën përballë Elbasanit. Kampionët në fuqi triumfuan 0-3 në pallatin e sportit “Tomorr Sinani” në një takim që zgjati 65 minuta.
Bardheblutë e Arben Sakos nuk e diskutuan për asnjë moment fitoren ndaj një rivali dukshëm inferior, të përbërë nga vetëm 7 lojtarë.
Tirana triumfoi bindshëm të tria setet, respektivisht 17-25, 19-25 dhe 16-25. Brazilani Gulherme Schein ishte shënuesi më i mirë i takimit, autor i 13 pikëve për Tiranën, me bardheblutë që tashmë ngjiten në vend të tretë.
Java e tretë e Superligës do të kompletohet sot me ndeshjen Teuta-Skënderbeu.
