Katër persona janë arrestuar, ndërsa dy të tjerë janë shpallur në kërkim nga policia e Tiranës, pasi akuzohen se tentuan ti merrnin 70 mijë një biznesmeni përmes mashtrimit.
Në pranga u vunë Xhonatan Xhaferri, 24 vjeç, Leonard Xhika, 39 vjeç, Mikel Panxhi, 30 vjeç, të tre banues në Elbasan, dhe Petro Ferzaj, 51 vjeç, banues në Vlorë.
Gjithashtu, u shpallën në kërkim Xhensil Qefa, 27 vjeç, banues në Elbasan, dhe Florian Gjergji, 40 vjeç, banues në Shkodër. Florian Gjergji është në kërkim edhe për disa raste të tjera të ngjashme.
Këta persona “kanë tentuar të mashtrojnë një shtetas (biznesmen), për të përfituar shumën 70 000 euro, duke u prezantuar si përfaqësues të një zyrtari shtetëror”, njoftoi policia këtë të premte.
Në cilësinë e provës materiale u sekuestruan 2 automjete dhe 6 aparate celulare.
Aksioni i koduar “Fraud” u zhvillua nga efektivët e komisariatit 6 në bashkëpunim me atë të hetimeve për krimin ekonomik në drejtorinë e Tiranës dhe atë të Elbasanit, në drejtimin e Prokurorisë Tiranë.
