Grupi kriminal qe u përlesh me policinë e Kosovës në fshatin Banjskë të Zvecanit, kishte armatime me vlerë prej mbi 5 milionë euro dhe sasi të mjaftueshme për të armatosur qindra luftëtarë.
Kështu u shpreh kryeministri Albin Kurti gjatë mbledhjes së qeverisë, ditën e mërkurë, duke theksuar se të dielën ishte dëshmuar potenciali dhe rrezikshmëria e grupeve kriminale në veri.
Ai tha se sulmi terrorist, ku u përfshinë individë të sanksionuar nga SHBA-ja dhe Britania e Madhe, kishte cenuar sovranitetin dhe integritetin territorial.
“Me mbi pesë milionë euro vlerë të armatimit ushtarak dhe sasi të mjaftueshme për një grup me qindra luftëtarë, është dëshmuar skenari për gjakderdhje në Kosovë. Aty janë përfshirë individë të sanksionuar nga Shtetet e Bashkuara të Amerikës dhe Mbretëria e Bashkuar për aktivitete kriminale. Ata janë në kërkim të institucioneve të drejtësisë për vepra penale në Kosovë. Ata shfaqën në krahë e përkrah e në një tryezë në Beograd e në Rashkë me presidentin e Serbisë, Vuçiç duke paralajmëruar rolin e drejtpërdrejt të shtetit serb në këtë mes.”
Teksa i bëri thirrje serbëve të çlirohen nga tutela e Beogradit, Kurti theksoi se sulmi i 24 shtatorit kishte ekspozuar vështirësitë dhe nevojën për më shumë bashkëpunim ndërkombëtar në ruajtjen, mbrojtjen dhe kontrollin e kufijve të Kosovës me Serbinë.
“Sulmi terrorist i së dielës gjithashtu ka ekspozuar edhe vështirësitë sa edhe nevojën për bashkëpunim ndërkombëtar edhe më të madh për ruajtjen, mbrojtjen dhe kontrollin e kufirit me Serbinë. E bashkë me të edhe nevojën për dënim të hapur me gjuhë të qartë e të përveçme dhe kërkesa të prera ndaj Serbisë nga komuniteti ndërkombëtar. Njëkohësisht, pas dokumentimit të pjesëmarrjes në këtë sulm terrorist, të nënkryetarit të Listës Serbe, Milan Radojiçiç është vërtetuar edhe një gjë që meriton vëmendjen e të gjithëve, rëndësia jetike e ringjalljes së pluralizmit politik të serbëve në Kosovë. Nuk ka demokraci e liri pa pluralizëm, serbët e Kosovës duhet të çlirohen nga tutela serbe.”
Mbledhja e qeverisë nisi me një minutë heshtje për rreshterin e vrarë, Afrim Bunjaku, ndërsa u miratua një ndihmë prej 50 mijë dollarësh për familjet e tij.
Kryeministri vlerësoi profesionalizmin e jashtëzakonshëm të policisë së Kosovës, duke e cilësuar aksionin si suksesin më të madh që prej shpalljes së pavarësisë.
