Ikona e futbollit tiranas, Osman Mema, u nda nga jeta ditën e djeshme në moshën 84-vjeçare.
Osman Mema ishte futbollisti më i dekoruar në vendin tonë, ndërsa arriti të fitojë plot 7 herë kampionatin kombëtar, në vitet 58-71 duke përfaqësuar të dyja skuadrat e kryeqytetit, Tiranën dhe për Partizanin.
I vlerësuar me titullin e lartë “Mjeshtër i Madh”, Osman Mema, anëtar i dinastisë së familjes së futbollit Mema, familje, e cila ndër vite ka nxjerrë futbollistë cilësorë.
Ndërkohë ditën e sotme, ka reaguar zyrtarisht klubi i futbollit të Tiranës duke i shprehur ngushëllime familjes dhe miqve të tij.
Reagimi i Tiranës:
Prehu në paqe Osman Mema
Futbolli shqiptar dhe familja bardh’ e blu kanë humbur një personalitet të madh që ka dhënë një kontribut të jashtëzakonshëm edhe të vyer për Kombëtaren dhe klubin e futbollit Tirana.
Ish-mesfushori Osman Mema, është ndarë nga jeta në moshën 84-vjeçare dhe lë pas kujtime të jashtëzakonshme si lojtari më i dekoruar tek bardh’e blutë si shtatë herë kampioni i Shqipërisë.
Mema, një nga pinjollët më të famshëm së dinastisë Mema, është përcjellë sot për në banesën e fundit nga ajo që ishte shtëpia e tij e dytë. Homazhet për ikonën e futbollit shqiptar, Osman Mema u kryen në hollin e stadiumit “Selman Stërmasi”.
KF Tirana i shpreh ngushëllimet më të sinqerta familjes Mema, të afërmve dhe miqëve të tyre për këtë humbje të madhe.
Emër që nuk do të harrohet! Përgjithmonë në kujtimet dhe zemrat tona!
