Kreu i PD-së, Sali Berisha ka reaguar, pasi ish-zyrtari i FBI-së, Charles McGonigal, pranoi tëgjitha akuzat që kishin të bënin me Shqipërinë, përfshirë kontaktet me kryeministrin e Shqipërisë, Edi Rama dhe këshilltarin jozyrtar të kryeministrit, Dorian Duçka, apo dhe se kishte marrë 225,000 dollarë nga shqiptaro-amerikani, Agron Nezaj, i cili sipas dokumentave në gjykatë, u bë informatori për hetimin e FBI-së lidhur me kontaktet dhe takimet e tij në Shqipëri.
Në një postim në rrjetet sociale, Berisha shkruan se Charles McGonigal është bashkëfajtor me kryeministrin Edi Rama dhe sipas tij, në muajin shkurt do të jenë të dy në burg.
Më tej lideri demokrat shton se gjykatësja në rast se pranon marrëveshjen jep vendimin deri në 5 vjet burg për ish-zyrtarin e FBI-së, ndërsa për Edi Ramën, Dorian Duçkën dhe Agron Nezën sipas avokatëve amerikanë nuk do ketë marrëveshje, por dënimet do shkojnë nga 7 deri në 15 vite.
Sipas Berishës, kjo ishte dhe arsyeja pse kryeministrit Edi Rama iu duk salla e Këshillit të Sigurimit si rreth i ferrit.
Postimi i plotë:
Bashkëfajtorë! Ndajnë fatin, e meritojnë!
Në shkurt të dy në burg.
Të dashur miq, dje McGonigal pranoi të gjitha akuzat penale për veprat penale të kryera në bashkëpunim direkt me Edi Ramën, Dorian Duçkën dhe Agron Nezën në Shqipëri. Në shkurt gjykatësja në rast se pranon marrëveshjen jep vendimin deri në 5 vjet burg. Kurse për Edi Ramën, Duçkën dhe Nezën sipas avokatëve amerikanë nuk do ketë marrëveshje, por dënimet do shkojnë nga 7 deri në 15 vite! Prandaj Edi Ramës iu duk salla e KS si rreth i ferrit!
