Enea Jorgji ka qenë protagonist i një momenti që do të shkaktojë jo pak polemika pas ndeshjes mes Jang Bojs dhe Lajpcig në Ligën e Kampioneve.
Gjithçka kishte të bënte më një episod të diskutueshëm për një penallti në fillimin e pjesës së dytë.
Çavi Simons hyri në zonën e Young Boys dhe pas një kontakti me portierin u rrëzua, duke kërkuar penallti. Jorgji nuk sinjalizoi nga pika e bardhë, ndërsa lojtari i gjermanëve protestonte me ngulm për këtë vendim që shpresonte të ishte në favor të tij.
Gjyqtari shqiptar mori më pas një sinjalizim nga VAR-i dhe pas disa çastesh shqyrtimi të italianit Marko Guida i cili ishte asistenti i tij para monitorit, ai vendosi të shkonte të shihte vetë pamjet.
Jorgji vëzhgoi të gjitha këndet e aksionit dhe më pas u kthye në fushë duke bërë shenjë me dorë nga pika e bardhë, e më pas me gisht që nuk kishte penallti, pra që i qëndronte vendimit të tij.
Një moment që shkaktoi konfuzion te gjermanët, të cilët menduan se dha penallti e nisën të festonin, për të mbetur më pas të befasuar e dëshpëruar kur gjyqtari siguroi që nuk kishte penallti në favor të tyre duke dhënë rivënie loje për portierin.
