Kryetari i PD-së, Sali Berisha hodhi akuza këtë të martë ndaj biznesmenit strategjik të qeverisë Pëllumb Gjoka, i arrestuar në kuadër të operacionit “Metamorfoza”, pasi akuzohet se porositi një vrasje.
Gjatë një takimi elektoral në Kukës, Berisha e cilësoi ligjin e investimeve strategjike “Ligji Gjoka”. Për biznesmenin e arrestuar, u shpreh se “ky bandit që ka marrë titullin e investitorit strategjik në Velipojë”.
Sipas kryedemokratit, Pëllumb Gjoka vrau një të moshuar për ti marrë tokën. Berisha u shpreh se në bizneset e Gjokës ka përfitime dhe kreu i qeverisë Edi Rama.
“Shumë nga investitorët strategjikë të Ramës janë Pëllumb Gjoka të tjerë, marrin një thes me euro droge, shkojnë dhe marrin 200 mijë, 300 mijë euro. Pëllumb Gjoka ka marrë 300 mijë metër katrorë në Velipojë, e vrau të moshuarën 90 vjeç dhe i mori tokën me Edi Ramën. Dhe përjashtohet nga taksat dhe detyrimet dhe ndërton parajsën e tij të tërën mbi drogën, kurse këtu, të gjitha këto mrekulli të vërteta të natyrës, mbeten në një kohë tmerrësisht të ngadaltë, me investime shumë të rralla, pavarësisht se rruga ka shkuar. Por qeveria, në vend që të financojë dhe të subvencionojë investimet, ajo përqendrohet në bllokimin dhe mbytjen e tyre. E njëjta gjë mund të thuhet për mineralet. E njëjta gjë me taksat”, tha Berisha gjatë një takimi krah kandidatit të koalicionit opozitar “Bashkë Fitojmë” për zgjedhjet e parakohshme në Kukës, që zhvillohen këtë të diel.
