Dy javë më parë “Stop” transmetoi denoncimin e zonjës Nafije në adresë të Azilit Privat “Rrezet e jetës”. Në këtë shtëpi për kujdesin e të moshuarve ishte akomoduar nëna e saj, e ndjera Kadrije Ruko nga djali i madh. Sipas Nafijes, nëna 86 vjeçare e paralizuar, është dhunuar dhe abuzuar në këtë institucion.
Madje vetë Nafija konstatoi hematoma në trupin e së ëmës së ndjerë. Zonja Nafije ka edhe fotografi, që i ka bërë së ëmës ku duken shenjat e abuzimit. Lili Sadaj, bashkëshortja e administratorit të azilit “Rrezet e Jetës”, tha se e ndjera Kadrije, herë pas here bënte veprime të pakontrolluara.
Nga ana tjetër, për doktorin e qendrës Selim Ibrahimi, diagnoza ishte tension dhe probleme kardiake.
Pas transmetimit të “Stop”, inspektori i Drejtorisë së Inspektimit të Standardeve të Shërbimeve Shoqërore Ardian Stafa, pas kontrollit në këtë institucion thotë, se nuk është gjetur asnjë situatë e dokumentuar, ngjarje pozitive apo incidente.
“Mungon kjo lloj gjëje për të gjitha”.
Azilit privat i është lënë detyrë, që të dokumentojë çdo vizitë, përshtypje apo ankesë, dhe nëse nuk plotësohet kjo detyrë, “Rrezet e jetës” mund të përballet me pezullim të licencës.
“Kemi mosdokumentim. Kjo bën që një nga standardet që rregullon gjithë procedurën e trajtimit të ankesave dhe më gjerë të mos jetë përmbushur. Janë lënë masa, të trajtohen me procedurë, të regjistrohen të gjitha incidentet. Kuptohet që kur thua procedurë ke parasysh të dokumentosh si e ke trajtuar. Mospërmbushja nga ana e qendrës më pas do të bëjë shkak për propozim sanksionesh siç i propozon ligji”./ Tv Klan
