Një ngjarje e rëndë ka ndodhur në orët e para të mëngjesit të sotëm në Përmet.
Një 82 vjeçar ka goditur disa herë me shkop druri bashkëshorten e tij 80 vjeçare e si pasojë kjo e fundit ka ndërruar jetë.
E moshuara është gjetur fillimisht e pajetë nga shërbyesja që punonte në banesën e çiftit dhe pas ekzaminimeve ka rezultuar se është goditur me shkop druri nga burri i saj.
Ky i fundit është shoqëruar në komisariat për veprime të mëtejshme, ndërsa ende nuk dihen shkaqet që e kanë cuar të moshuarin në aktin ekstrem.
“Rreth orës 06:30, të mëngjesit, shtetasja V. Dh., e cila punon si shërbyese në banesën e çiftit të të moshuarve L. P., 82 vjeç dhe A. P., 80 vjeçe, ka gjetur në banesën ku shërben, të pa jetë dhe me shenja dhune shtetasen A. P., 80 vjeçe.
Menjëherë në vendngjarje, ka shkuar grupi hetimor dhe nga veprimet e para hetimore dyshohet se 80 vjeçarja është goditur me sende të forta (shkop druri), nga bashkëshorti i saj shtetasi L.P, banues në fshatin Pëllumbarë.
Shërbimet e Policisë kanë shoqëruar në Komisariatin e Policisë Përmet, për veprime të mëtejshme procedurale shtetasin L.P, i proceduar penalisht edhe më parë për veprën penale “Dhuna në familje””,- njofton Policia.
Grupi hetimor nën drejtimin e Prokurorisë vijon punën për sqarimin e rrethanave të kësaj ngjarjeje.
