Në kuadër të megaoperacionit policor antidrogë të koduar “Tempulli”, Policia e Kukësit njofton se ka arrestuar sot, katër persona dhe një e ka proceduar në gjendje të lirë.
“Në funksion të një hetimi të ndjekur me metoda proaktive, në kuadër të megaoperacionit policor mbarëkombëtar, antidrogë, të koduar “Tempulli”, u evidentua dhe u godit një rast i shitjes së dozave të lëndës narkotike cannabis sativa, në një lokal, në Krumë, Has”, njofton Policia.
“Për këtë rast u kapën në flagrancë dhe u arrestuan shtetasit A. Sh., 22 vjeç, A. L., 23 vjeç, F. F., 21 vjeç dhe L. P., 20 vjeç, të katërt banues në Krumë. Nga kontrollet në lokalin e marrë me qira nga 22-vjeçari, Policia konstatoi se ky ambient ishte përshtatur për përdorim dhe shitje në doza, të cannabis sativës, si dhe për organizim të lojërave të fatit”, vijon njoftimi.
“Nga ky ambient, me cilësinë e provës materiale, u sekuestruan një sasi lënde e dyshuar narkotike cannabis sativa, e ndarë në disa doza të gatshme për shitje, një valixhe me sende për lojën “Poker” dhe 4 celularë. Gjithashtu, për këtë rast u referuan materialet në Prokurori ku nisi procedimi në gjendje të lirë, për veprën penale “Moskallëzimi i krimit”, për shtetasin A. M., 25 vjeç, banues në Krumë”, njofton Policia.
